संगमनेर गटार दुर्घटना प्रकरण……

मयत अतुल पवार यांच्या कुटुंबीयांना दहा लाख रुपयांची मदत 

आमदार खताळ यांच्या पुढाकाराने नगरपालिकेने दिला धनादेश 

संगमनेर प्रतिनिधी दिनांक 18

संगमनेर येथील गटार दुर्घटना प्रकरणातील मयत अतुल रतन पवार या तरुणाच्या आई-वडिलांना आमदार अमोल खताळ यांच्या सूचनेनंतर संगमनेर नगरपालिकेचे मुख्याधिकारी रामदास कोकरे यांनी दहा लाख रुपयांचा धनादेश घरपोहच केला असल्याची माहिती आमदार खताळ यांच्या प्रसिद्धी विभागाकडून देण्यात आली आहे.

देण्यात आलेल्या प्रेसनोट मध्ये म्हटले आहे की, संगमनेर शहरातील कोल्हेवाडी रोडवर नॅशनल इंग्लिश मीडियम स्कूलजवळ भूमिगत गटारीत साफसफाईचे काम सुरू असताना अतुल रतन पवार या युवकाचा गॅसमुळे गुदमरून दुर्दैवी मृत्यू झाला होता. या घटनेनंतर आमदार खताळ यांनी पवार कुटुंबीयांची भेट घेऊन त्यांचे सांत्वन केले होते. त्याच वेळी त्यांनी शासनाच्या वतीने ३० लाख रुपयांची मदत देणार असल्याचे लेखी पत्र दिले होते.

आमदार खताळ यांच्या सूचनेनुसार संगमनेर नगर परिषदेचे मुख्याधिकारी तथा प्रशासक रामदास कोकरे यांनी यावर कार्यवाही करत आवश्यक त्या कागदपत्रांची पूर्तता करून १० लाख रुपयांचा मदतीचा धनादेश मयत पवार या कुटुंबीयांच्या निवासस्थानी जाऊन त्याच्या आईवडिलांकडे सुपूर्त केला. ही मदत मिळाल्याने पवार कुटुंबीयांनी आमदार खताळ व नगरपरिषद प्रशासनाचे आभार मानले असून, उर्वरित रकमेची सुद्धा लवकरच कार्यवाही पूर्ण करणार असल्याचे मुख्याधिकारी कोकरे यांनी सांगितले.

मयत रियाज पिंजारी कुटुंबीयांना देखील मुख्यमंत्री सहाय्यता निधीतून मदत मिळावी — आमदार खताळ

संगमनेर येथील गटार दुर्घटना प्रकरणी मयत अतुल रतन पवार या तरुणाला वाचवण्यासाठी गेलेला रियाज पिंजारी याचाही विषारी वायूमुळे गुदमरून दुर्दैवी मृत्यू झाला आहे. त्यामुळे शासनाने त्यास मुख्यमंत्री सहायता निधीतून मदत द्यावी अशी मागणी आमदार अमोल खताळ यांनी करत या मागणीकडे सरकारचे लक्ष वेधले.