संगमनेरच्या अवैध कत्तलखान्यात गोवंश कत्तलींचा हैदोस सुरूच !

पोलीस उपअधीक्षकांच्या पथकाने केली दोन ठिकाणी कारवाई

संगमनेर प्रतिनिधी दिनांक 4 —

संगमनेर शहरातील अवैध कत्तलखान्यांमधून गोवंश कत्तलींचा हैदोस सुरूच असल्याचे वारंवार उघड होत आहे. संगमनेरचे पोलीस उपअधीक्षक कुणाल सोनवणे यांच्या पथकातील पोलीस कर्मचाऱ्यांनी शहरात दोन ठिकाणी कारवाई केली आहे. या छाप्यांमधून गोवंश जनावरांचा सुटकेसह गोमांस जप्त करण्यात येऊन गुन्हे दाखल करण्यात आले आहेत.

पहिल्या कारवाईत शहरातील जमजम कॉलनी परिसरातील नावंदर प्लॉट जवळ पाठवणात डांबून निर्दयपणे बांधून ठेवलेल्या एका गाईसह पाच वासरांची कसायाच्या तावडीतून सुटका करण्यात आली असून कमरअली गुलाम सौदागर (राहणार संगमनेर) याच्यावर गुन्हा दाखल करण्यात आला आहे. पोलिसांनी एक लाख 70 हजार रुपयांचा मुद्देमाल जप्त केला आहे. पोलीस कॉन्स्टेबल राहुल कैलास सारबंदे यांनी यासंदर्भात फिर्याद दिली आहे.

तर दुसऱ्या कारवाईत पोलिसांच्या पथकाने जोर्वे नाका येथे पेट्रोलिंग करताना पोलीस उपाधीक्षकांना मिळालेल्या गुप्त माहितीनुसार आरोपी कमरअली गुलाम जिलानी सौदागर यांच्या वाड्यात गोवंश जनावरांची कत्तल सुरू असल्याची माहिती मिळाली. त्या ठिकाणी छापा टाकला असता सदर इसम गोवंश जनावरांची कत्तल करताना आढळून आला. एका पत्र्याच्या वाड्यात कत्तल केलेल्या जनावरांचे गोमांस त्या ठिकाणी आढळून आले. तसेच गोवंश जनावरांचे अनावश्यक असलेले अवयव तेथे पडलेले आढळून आले. कमरअली गुलाम जिलानी सौदागर (राहणार भारत नगर) याच्याविरुद्ध गुन्हा दाखल करण्यात आला असून पोलिसांनी सदर ठिकाणी 1 लाख 51 हजार रुपयांचा मुद्देमाल जप्त केला आहे.

पोलीस सब इन्स्पेक्टर बाळू घोडे, पोलीस कॉन्स्टेबल लक्ष्मण खेडकर, पोलीस कॉन्स्टेबल राहुल सारबंदे यांनी ही कारवाई केली आहे. एकंदरीत पाहता संगमनेर शहरात गोवंश कत्तलींनी मोठा जोर धरला असल्याचे दिसून येत आहे.