चोरीचे दागिने घेणाऱ्या सोनार महिलेचा जामीन अर्ज जिल्हा न्यायालयाने फेटाळला !

संगमनेर दि. 24 — प्रतिनिधी

मोटर सायकलवर येऊन महिलेच्या गळ्यातील दागिने लंपास करीत नंतर तेच दागिने शहरातील सोनाराला विकण्यात आले. असे चोरीचे दागिने विकत घेतलेल्या शहरातील एका आरोपी महिला सोनाराला संगमनेरच्या जिल्हा व अतिरिक्त सत्र न्यायालयाच्या न्यायाधीशांनी अटकपूर्व जामीन नाकारला आहे.

जामीन नाकारताना अर्जदार आरोपीने स्वतःच्या आर्थिक फायद्यासाठी दागिने स्वीकारले असले तरी अशा स्वरूपाच्या गुन्ह्यात मुद्देमाल हस्तगत करण्यासाठीच नव्हे तर अशाच प्रकारचे इतर गुन्हे उघडकीस येण्यासाठी व गुन्हा करणाऱ्या आरोपींची गुन्हा करण्याची पद्धत जाणून घेण्यासाठी अर्जदार आरोपीचा पोलिसांकडून तपास होणे आवश्यक असल्याचा व अर्जदाराला अटकपूर्व जामीन दिला तर तपासी यंत्रणेला कायद्याने प्राप्त झालेले अधिकार हिरावून घेतले जाण्याची शक्यता असल्याचे स्पष्ट करत हा महत्त्वाचा निष्कर्ष न्यायाधीश योगेश मनाठकर यांनी नोंदविला आहे.

झेंडावंदनाचा कार्यक्रम संपवून दुचाकीवरून घरी जाणाऱ्या महिलेच्या गळ्यातील सोनसाखळी धूम स्टाईल लांबविण्याची घटना नाशिक पुणे मार्गावरील अमृता लॉन्स जवळ घडली होती. विना क्रमांकाच्या मोटार सायकल वरून आलेल्या दोघांनी या महिलेच्या गळ्यातील चार तोळे वजनाचे गंठण हिसकावत नाशिकच्या दिशेने पलायन केले होते. महिलेच्या गळ्यातील दागिने लांबविणाऱ्या बलराम यादव आणि दीप भटू सातपुते या दोघांना पोलिसांनी पकडले होते.

दोन्ही आरोपींना पकडल्यानंतर त्यांनी चोरी केलेले दागिने शहरातील एका सोनाराला विकल्याची कबुली दिल्यानंतर पोलिसांना तपासात हे दागिने रितेश संतोष नागरे व शिल्पा संतोष नागरे (जामीन अर्जदार) या महिला सोनारासह तिच्या मुलाने घेतल्याचे आढळून आल्याने पोलिसांनी या सोनारांना देखील या गुन्ह्यात आरोपी केले होते.

आरोपीकडून दागिने घेताना संबंधित सोनारांना हा चोरीचा मुद्देमाल आहे हे माहीत असताना देखील त्यांनी ते दागिने विकत घेतले. त्यामुळे अर्जदार आरोपींकडून गुन्ह्यातील मुद्देमाल जप्त करण्यासाठी पोलिसांना त्यांचा ताबा मिळण्यासाठी अटकपूर्व जामीन रद्द करण्याची मागणी तपासी अधिकाऱ्यांनी न्यायालयाकडे केली होती.

तसेच आरोपींनी केवळ याच गुन्ह्यात नव्हे तर अनेक गुन्ह्यात रॉबरीद्वारे हस्तगत केलेला सोन्याचा माल आरोपींनी अर्जदाराकडे विकला असल्याचे व विकत घेत असलेले दागिने चोरी अथवा रॉबरीचे असल्याचे अर्जदाराला माहीत असल्याचे सरकारी वकील मच्छिंद्र गवते यांनी न्यायालयासमोर आणले होते.

या सर्व बाबी लक्षात घेता जिल्हा व अतिरिक्त सत्र न्यायालयाने महिला सोनाराचा अटकपूर्व जामीन नाकारल्याने आता पोलीस या महिला सोनाराला अटक करून कधी चौकशी करतात याकडे लक्ष लागले आहे. या सर्व प्रकारातून असे चोरीचे दागिने घेणाऱ्या सोनारांनी योग्य तो धडा घ्यायला हवा अशा प्रक्रिया व्यक्त होत आहेत.