अभ्यास करत नाही म्हणून बापानेच मुलाचा केला खून !

संगमनेर टाइम्स न्यूज नेटवर्क – 17

मुलगा अभ्यास करत नाही म्हणून रागाच्या भरात अवघ्या नऊ वर्षीय मुलाचं डोकं भिंतीवर आपटून बापानेच खून केल्याचे घटना बारामती मध्ये घडली आहे. शिवाय ही घटना दाबण्याचा धक्कादायक प्रकारही करण्यात आला.

याप्रकरणी वडगाव निंबाळकर पोलीस ठाण्यातील पोलीस कॉन्स्टेबल सागर चौधरी यांच्या फिर्यादीवरून गुन्हा दाखल करण्यात आला आहे.

अधिक माहिती अशी की, बारामती तालुक्यातील होळमध्ये राहणाऱ्या पियुष विजय भंडलकर या नऊ वर्षांच्या मुलाचा त्याच्या वडिलांनीच खून केला आहे. मुलगा अभ्यास करत नाही म्हणून संतापलेल्या विजय भंडलकर यांनी पियुषचं डोकं भिंतीवर आपटून आणि गळा दाबून खून केला.

पियुषचे वडील विजय भंडलकर यांनी पियुषला, ‘तू अभ्यास करत नाही, सारखा बाहेर खेळत असतो. तू तुझ्या आईच्या वळणावर जाऊन माझी इज्जत घालवणार दिसतोय’, असे म्हणत त्याला हाताने मारहाण केली. नंतर त्यांनी रागाच्या भरात मुलाचा गळा दाबून त्याला भिंतीवर आपटले. यात मुलगा पियुषचा मृत्यू झाला.

मंगळवारी (14 जानेवारी) दुपारी ही घटना घडली. विजय भंडलकर यांच्या राहत्या घरी हा खून झाला. या खुनानंतर हे प्रकरण लपवण्याचा प्रयत्न नातेवाईकांनी केला.

मात्र, बारामतीतील वडगाव निंबाळकर पोलिसांनी या खुनाचं रहस्य उलगडवत वडील विजय गणेश भंडलकर, मृत पियुषची आजी शालन गणेश भंडलकर आणि संतोष सोमनाथ भंडलकर या तिघांवर गुन्हा दाखल केला.

पियुषची आजी शालन भंडलकर या तिथे उपस्थित होत्या. मात्र, त्यांनी त्यांच्या मुलाला अडवण्याचा प्रयत्नही केला नाही. तसेच मुलगा विजय यांच्या सांगण्यावरून पियुष चक्कर येऊन पडल्याची माहिती दिली. त्यांनी हा खून लपवण्याचा प्रयत्न केला.