संगमनेरच्या हरीबाबा देवस्थानला तीर्थक्षेत्राचा “क” वर्ग दर्जा प्राप्त

आमदार सत्यजित तांबे यांनी केला होता पाठपुरावा. 

संगमनेर प्रतिनिधी 11–

नाशिक – पुणे महामार्ग लगत असलेल्या व तालुक्यातील हजारो भाविकांचे श्रद्धास्थान असलेल्या वेल्हाळे येथील हरीबाबा देवस्थानला आमदार सत्यजित तांबे यांच्या सततच्या पाठपुराव्यामुळे क वर्ग तीर्थक्षेत्राचा दर्जा मिळाला आहे. यामुळे या परिसरात सुशोभीकरणासह भाविकांसाठी विविध सुविधा निर्माण होणार आहेत.

वेल्हाळे परिसरातील हरीबाबा हे प्रसिद्ध देवस्थान असून साखर कारखाना, मालदाड, सायखिंडी, गुंजाळवाडी व परिसरातील हजारो भाविकांचे हे श्रद्धास्थान आहे. येथे होणारी भव्य जत्रा व विविध कार्यक्रम लक्षात घेऊन लोकनेते बाळासाहेब थोरात यांच्या माध्यमातून या मंदिर परिसरात विकासाच्या विविध योजना राबविण्यात आल्या आहेत. नाशिक पुणे महामार्ग लगत असल्याने व भाविकांचे श्रद्धास्थान असल्याने या ठिकाणी वर्षभरात हजारो भाविक येत असतात. दरवर्षी येथे येणाऱ्या नागरिकांची संख्या वाढत आहे. परंतु या ठिकाणी भौतिक सुविधांचा अभाव असल्याने अनेक भाविकांची गैरसोय होते.

त्यामुळे या परिसराच्या विकासाबरोबर हरिबाबा मंदिर देवस्थानला क वर्ग तीर्थक्षेत्रात दर्जा प्राप्त झाल्यास या ठिकाणी सुशोभीकरणासह सर्व सुविधा निर्माण करण्यात येतील याकरता आमदार सत्यजित तांबे यांनी जिल्हा नियोजन समिती कडे 30 जानेवारी 2025 रोजी पत्र देऊन क वर्ग तीर्थक्षेत्र दर्जा देण्याची मागणी केली होती. याचबरोबर क वर्ग तीर्थक्षेत्र बाबतचा प्रस्तावही सादर केला होता . त्यानंतर ही या कामासाठी आमदार सत्यजित तांबे आणि सातत्याने पाठपुरावा केला.

आज अहिल्यानगर येथे झालेल्या जिल्हा नियोजन समितीच्या बैठकीमध्ये आमदार सत्यजित तांबे यांच्या मागणीवरून पालकमंत्री राधाकृष्ण विखे पाटील यांच्या अध्यक्षतेखाली वेल्हाळे येथील हरीबाबा देवस्थानला क तीर्थक्षेत्राचा दर्जा देण्यात आला आहे. यामुळे आता हरी बाबा मंदिर परिसरात सुशोभीकरणासह विविध सुविधा निर्माण होणार आहेत.

आमदार तांबे यांच्या पाठपुराव्यातून हरिबाबा देवस्थानला क वर्ग तीर्थक्षेत्राचा दर्जा मिळाल्याबद्दल वेल्हाळे, हरी बाबा देवस्थान ट्रस्ट, सायखिंडी, मालदाड, घुलेवाडी, अमृतनगर, गुंजाळवाडी, चिकणी, राजापूर, सुकेवाडी यांसह परिसरातील नागरिकांनी लोकनेते बाळासाहेब थोरात व आमदार सत्यजित तांबे यांचे अभिनंदन केले आहे.