संगमनेरात खोट्या नोटा छापण्याचा प्रयत्न !

रेव्हेन्यू इंटेलिजन्स पुणे पथकाची कारवाई

संगमनेर प्रतिनिधी दि. 20

बनावट नोटा तयार करण्यासाठी लागणारा कागद तस्करीच्या स्वरूपाने भारतात आलेला असताना तो कागद कुरिअरच्या माध्यमातून संगमनेर येथे मागवून प्रिंटरच्या सहाय्याने भारतीय चलनातील बनावट नोटा बनविण्याचा प्रयत्न एका घरात करणाऱ्या इसमावर छापा घालून त्याला पकडण्यात आले आहे. डायरेक्टर ऑफ रेव्हेन्यू इंटेलिजन्स पुणे च्या पथकाने ही कारवाई आज सकाळी केली आहे.

रजनीकांत राजेंद्र रहाणे (रा. राहणे मळा, गुंजाळवाडी, तालुका संगमनेर, जिल्हा अहिल्यानगर) असे ताब्यात घेतलेल्या युवकाचे नाव आहे.

संबंधित विभागाला गुप्तरित्या माहिती मिळाली होती की, बाहेरील देशातून मोठ्या प्रमाणावर हाय सिक्युरिटी आरबीआय ट्रेड पेपर की जो खोटा नोटा बनवण्यासाठी वापरण्यात येतो असा पेपर भारतात आला आहे. सदर पेपरच्या वापरामुळे खोट्या नोटा मोठ्या प्रमाणात बनवण्यात येऊन त्यामुळे भारत सरकारची फसवणूक होऊन मोठ्या प्रमाणात महसुली नुकसान होणार आहे. सदर पेपर हा डीटीडीसी या कुरिअर कंपनी मार्फत देशभरात पाठविण्यात आलेला आहे. त्यातच हा पेपर सदर कंपनी मार्फत संगमनेर मध्ये सुद्धा पाठवण्यात आल्याची माहिती मिळाली व संगमनेर मध्ये एक ऑर्डर डिलिव्हरी झाली असल्याची पक्की माहिती संबंधित विभागाला मिळाली. सदर पेपर हे बाहेरील देशातून तस्करीद्वारे भारतात आले असल्याने त्याबाबत कारवाई करण्याबाबत कार्यालयाने हालचाली सुरू केल्या.

सदर माहितीच्या अनुषंगाने डेप्युटी डायरेक्टर ऑफ पुणे यांनी छापा घालून कारवाई करण्याचा आदेश फिर्यादी वरिष्ठ इंटेलिजन्स अधिकारी यांना मिळाला. वरिष्ठ अधिकारी झाकीर हुसेन मुल्ला तसेच अजय अथविया, पवन पहेलवार व महिला अधिकारी ज्योती विचारे अशा इंटेलिजन्स विभागाच्या अधिकाऱ्यांचे पथक नेमणूक करण्यात आले. सदर आदेशाच्या अनुषंगाने पथकाने आज संगमनेर शहरालगत असणाऱ्या गुंजाळवाडी शिवारातील राहणे मळा या ठिकाणी कारवाई केली असता रजनीकांत राजेंद्र रहाणे याला राहत्या घरीच ताब्यात घेतले. त्याच्याकडून माहिती घेण्यास सुरुवात केल्यास आणि अंग झडती घेण्यास नकार दिल्याने त्या घराची तपासणी देखील करण्यात आली.

सदर घराच्या पहिल्या मजल्यावर असणाऱ्या खोलीमध्ये एका प्लास्टिक पिशवीमध्ये ए फोर  साईचे शंभर पेपर मिळून आले त्या पेपरची पाहणी केली असता हाय सिक्युरिटी ग्रेड असलेली रंगीत पट्टी त्या ठिकाणी दिसून आली. त्यावरून सदर पेपर हा भारतीय चलनातील खोट्या नोटा बनवण्यासाठी वापरत असल्याची खात्री झाली. तसेच त्याच ठिकाणी एका प्लास्टिकच्या कचऱ्याच्या डब्यात काही ए फोर  साईजचे फाडलेले पेपर आढळून आले. सदरची पेपरची पाहणी केली असता त्यावर भारतीय चलनातील 100 आणि 500 रुपयांच्या नोटा छापलेल्या दिसून आल्या परंतु त्या व्यवस्थित छापल्या नसल्याने त्या फाडून कचऱ्याच्या डब्यात फेकून दिल्या असल्याचे दिसले.

सदर खोलीत एचपी कंपनीचा स्मार्ट टॅंक 585 ऑल इन वन हा रंगीत प्रिंटर मिळून आला. रजनीकांत राहणे याकडे चौकशी केली असता त्याने सांगितले की अलीबाबा ऑनलाईन साइटवरून हाय सिक्युरिटी ट्रेड असलेली रंगीत पट्टी पेपरची ऑनलाईन खरेदी केली होती. सदर पेपरवर तो एचपी कंपनीच्या ऑल-इन-वन प्रिंटरचा वापर करून भारतीय चलनातील खोट्या नोटा बनवण्याचा प्रयत्न करत असल्याचे उघड झाले. काही खोट्या नोटा व्यवस्थित छापल्या न गेल्याने त्या पाडून फेकून दिल्या असल्याचेही कबूल केले.

त्यामुळे गुंजाळवाडी शिवारात सदर ठिकाणी छापा टाकला असता रजनीकांत राहाणे हा ऑनलाइन साईट अलीबाबा या ठिकाणावरून डीटीडीसी या कुरिअर कंपनी मार्फत हाय सिक्युरिटी पेपर मागवून त्याचा बनावट नोटा छापण्याचा प्रयत्न करत असल्याची फिर्याद वरिष्ठ इंटेलिजन्स अधिकारी झाकीर हुसेन मुल्ला यांनी दिली असून संगमनेर शहर पोलीस ठाण्यात गुन्हा दाखल करण्यात आला आहे.