पाच लाख रुपयांच्या खंडणी प्रकरणी आरोपी कृष्णा सारडा हिचा अटकपूर्व जामीन अर्ज न्यायालयाने फेटाळला !

संगमनेर – प्रतिनिधी दि. 14

बदनामी करण्याच्या उद्देशाने साखरपुड्याचे जुने फोटो व्हायरल करून त्या बदल्यात पाच लाख रुपयांच्या खंडणीची मागणी केल्याप्रकरणी संगमनेर शहर पोलिसांनी एका महिलेसह तिघांवर गेल्या महिन्यात गुन्हा दाखल केला होता. या प्रकरणातील महिला आरोपी कृष्णा सारडा हिचा अटकपूर्व जामीन अर्ज जिल्हा न्यायालयाने फेटाळून लावला आहे. यामुळे खंडणी प्रकरणातील आरोपींच्या अडचणीमध्ये वाढ झाली आहे.

कृष्णा अजित सारडा (रा. अशोक चौक, संगमनेर) गोविंद नागरे (रा. नेहरू चौक, संगमनेर) आणि ओंकार राऊत (रा. घुलेवाडी, संगमनेर) अशी खंडणी प्रकरणातील आरोपींची नावे आहेत.

शहरातील एक तरुणी व एका सामाजिक कार्यकर्त्याची बदनामी होईल व यामुळे त्यांचे वैवाहिक जिवन संपुष्टात येईल असे माहित असताना देखिल तिघा जणांनी त्यांच्या जुन्या साखरपुड्याच्या फोटोचा दुरुपयोग करून आरोपींनी फोटो व्हायरल करून तुमची बातमीही करून बदनामी करू अशी धमकी देऊन त्याबदल्यात सामाजिक कार्यकर्त्याकडे पाच लाख रुपयांची मागणी केली होती.

या घटनेतील फिर्यादी तरुणीचे सामाजिक कार्यकर्त्याचे लग्न ठरले होते. चार वर्षांपूर्वी त्यांनी संगमनेर तालुक्यातील पुणे नाशिक हायवे कऱ्हे घाटात एका छोट्या मंदिरात साखरपुडा देखील केला. मात्र यानंतर या दोघांमध्ये झालेल्या भांडणामुळे फिर्यादी तरुणी आणि हा कार्यकर्ता कधीही एकमेकांशी संपर्कात आले नाहीत. मात्र या दोघांमधील भांडणावेळी फिर्यादीचा मोबाईल ओंकार राऊत आणि त्याच्या पत्नीने काढून घेतला होता. त्यानंतर काही दिवसांनी फिर्यादी तरुणी आणि साक्षीदाराचा एकत्रित फोटो सामाजिक माध्यमांमध्ये व्हायरल करण्यात आला. त्यानंतर फिर्यादीच्या नावाचा वापर करत यातील आरोपी महिला कृष्णा सारडा हिने साक्षीदार सामाजिक कार्यकर्त्याने फसवून फिर्यादी तरुणीशी लग्न केले असून लग्नाचे फोटो माझ्याकडे आहे. या संदर्भातील बातमी न्यूज चॅनेलवर द्यायची नसेल तर सामाजिक कार्यकर्त्याकडे पाच लाख रुपयांची मागणी केली होती.

पाच लाख रुपयांची खंडणी मागितल्याने संतापलेल्या तरुणीने शहर पोलीस ठाण्यात धाव घेतली. सदर विवाहित महिलेने शहर पोलीस ठाण्यात दिलेल्या फिर्यादीवरून पोलिसांनी कृष्णा सारडासह तिघांविरुद्ध गु.र.नं. ४६/२०२५ भारतीय न्याय संहिता कलम ३५६ (२), ३०८ (२), ३०८(३) प्रमाणे गुन्हा दाखल केला असून पोलीस पुढील तपास करत आहेत.

दरम्यान यातील आरोपी कृष्णा सारडा हिने अटकपूर्व जामीन मिळविण्यासाठी संगमनेरच्या जिल्हा व अतिरिक्त सत्र न्यायालयात अटकपूर्व जामीन अर्ज दाखल केला होता. जिल्हा न्यायाधीश डी. एस. घुमरे यांच्यासमोर या अर्जाची सुनावणी झाली.

सुनावणी दरम्यान सरकार पक्षाचे सहाय्यक सरकारी वकील प्रमोद वाघ यांनी या मागील सर्व घटनाक्रम न्यायालयाच्या निदर्शनास आणून देत सखोल तपासासाठी आरोपीच्या कस्टडीची आवश्यकता असल्याची मागणी केली होती. आरोपी क्रमांक एक आणि दोन यांनी संगणमत करून फिर्यादी व साक्षीदाराचे साखरपुड्याचे फोटो अर्जदार आरोपी क्रमांक तीन हिला दिला होता. सदर फोटो प्रसारित करण्यास सांगितल्याचे संभाषण आरोपीने या सामाजिक कार्यकर्त्याकडे पाच लाख रुपये खंडणीची मागणी केली असल्याचे तसेच दहा हजार रुपयांची खंडणी दिली असल्याचे तपासात निष्पन्न झाले असल्याचे न्यायालयाच्या निदर्शनास आणले. आरोपी पोलिसांना सहकार्य करत नाही. याशिवाय अन्य महत्त्वाच्या बाबीही सरकारी वकील वाघ यांनी न्यायालयाच्या निदर्शनास आणून दिल्या.

सहाय्यक सरकारी वकील वाघ आणि आरोपींच्या वकिलांचा युक्तिवाद ऐकल्यानंतर जिल्हा न्यायाधीश डी एस घुमरे यांनी आरोपी महिला कृष्णा सारडा हिचा जामीन अर्ज नामंजूर केला. अटकपूर्व जामीनासाठी आरोपीला आता उच्च न्यायालयात जावे लागणार आहे.