पत्रकार असल्याचे सांगणाऱ्या व्यक्तीवर खंडणीचा गुन्हा ; तर फिर्याद देणाऱ्या महिलेविरुद्ध फसवणुकीचा गुन्हा दाखल !

प्रतिनिधी —

ह्यूमन राईट्स कमिशनचा पदाधिकारी आणि पत्रकार असल्याचे सांगून सहा लाख रुपये खंडणी मागणाऱ्या विरुद्ध गुन्हा दाखल करण्यात आला असून तक्रार करणाऱ्या महिलेविरुद्ध देखील फसवणुकीचा गुन्हा दाखल करण्यात आलेला आहे. त्यामुळे तथाकथित पत्रकार आणि खंडणी बाबत फिर्याद देणारी महिला या दोघांच्या विरुद्ध फिर्यादी दाखल झाल्याने संगमनेर शहरात तो चर्चेचा विषय ठरला आहे.

पुरोगामी पत्रकार संघाचा पत्रकार असल्याचे सांगणाऱ्या शौकत पठाण याच्याविरुद्ध खंडणीचा गुन्हा दाखल करण्यात आला आहे. या संदर्भात अमिना सलीम शेख ( रा. मालदाड रोड, संगमनेर) यांनी फिर्याद दिली आहे.

तर दुसरीकडे खंडणीची फिर्याद देणाऱ्या या अमिना शेख यांच्याविरुद्ध फसवणुकीचा गुन्हा संगमनेर शहर पोलिसांनी दाखल केला असून या प्रकरणी शहरातील अँग्लो उर्दू शाळेत उपशिक्षिका असलेल्या शाहिस्ता मुजिबूर रहमान शेख यांनी फिर्याद दिली आहे. खंडणी आणि फसवणूक अशी फिर्याद झाल्याने ह्या प्रकरणी संशयाचे वातावरण निर्माण झालेले आहे.

शौकत पठाण याने आपण ह्युमन राईट्स कमिशनचा पदाधिकारी आणि पुरोगामी पत्रकार संघाचा पत्रकार असल्याचे सांगत अमीना शेख यांच्याकडे सहा लाख रुपये खंडणीची मागणी केली असल्याची फिर्याद त्यांनी संगमनेर शहर पोलीस ठाण्यात दिली आहे. तसेच पठाण या इसमाने आपल्या विरोधात असंख्य तक्रारी प्राप्त झाल्या आहेत, त्यात व्हिडिओ संभाषणाच्या क्लिप, अश्लील फोटो असल्याचे सांगत पैशाची मागणी केली असल्याचे शेख यांनी फिर्यादीत म्हटले आहे.

तर अमिना शेख यांनी शहरातील एका शिक्षिकेला नोकरीत कायम करण्याची ऑर्डर मिळवून देण्याचे आमिष दाखवून त्यांची तब्बल ५ लाख ८० हजार रुपयांची फसवणूक केली असल्याची फिर्याद सदर उपशिक्षकेने शहर पोलीस ठाण्यात केल्याने आमिना शेख यांच्याविरुद्ध देखील फसवणुकीचा गुन्हा दाखल करण्यात आलेला आहे.

शाहिस्ता शेख यांनी यासंदर्भात फिर्याद दिली असून त्यांनी म्हटले आहे की, मी शहरातील अँग्लो उर्दू शाळेत गेल्या दहा वर्षापासून उपशिक्षिका म्हणून सेवेत आहे. या ठिकाणी अनुदानित पदावर नियुक्तीचे पत्र लवकरात लवकर मिळवून देण्यासाठी अमीना शेख यांनी ५ लाख ८० हजार रुपये घेतले. मात्र कुठलीही ऑर्डर दिली नाही. पैसे परत मागितले असता उडवा उडवीची उत्तरे दिली.

शहर पोलिसांनी शौकत पठाण याच्याविरुद्ध खंडणीचा गुन्हा दाखल केला आहे. तर अमिना शेख यांच्याविरुद्ध फसवणुकीचा गुन्हा दाखल केला आहे.