अंगणवाडी सेविका व आशा सेविकांचा पगार वाढ करणार — यशोमती ठाकूर

संगमनेरात कोरोना संकटात काम करणाऱ्या महिलांचा भव्य कौतुक सोहळा संपन्न

एकवीरा फाउंडेशनचे महिला सबलीकरणाचे काम कौतुकास्पद —  महसूल मंत्री थोरात

 प्रतिनिधी —

अंगणवाडी सेविका व आशा सेविका यांच्या पेन्शन योजना,एलआयसी योजना सह पगार वाढ करण्यात येणार असल्याची महत्त्वपूर्ण घोषणा राज्याच्या महिला व बालकल्याण विकास मंत्री यशोमती ठाकूर यांनी केली असून एकविरा फाउंडेशनच्या माध्यमातून महिला सबलीकरणाचे होत असलेले काम कौतुकास्पद असल्याचे गौरवोद्गार महसूल मंत्री बाळासाहेब थोरात यांनी काढले आहे.

वसंत लॉन्स येथे एकवीरा फाउंडेशनच्या वतीने कोरोनाच्या महासंकटात सेवाभावी पणे काम केलेल्या आरोग्य सेविका,अंगणवाडी सेविका,आशा सेविका, बचत गट महिला, मदतनीस या सर्व महिलांचा कार्यकर्तृत्वाचा कौतुक सोहळा संपन्न झाला.यावेळी त्या बोलत होत्या. या कार्यक्रमात यशोमती ठाकूर यांनी ऑनलाइन पद्धतीने सहभाग घेतला तर अध्यक्षस्थानी महसूलमंत्री बाळासाहेब थोरात होते.

व्यासपीठावर आमदार डॉ. सुधीर तांबे, कांचनताई थोरात, दुर्गाताई तांबे, शरयू देशमुख, एकवीरा फाउंडेशनच्या अध्यक्षा  डॉ.जयश्री थोरात, मिरा शेटे, पंचायत समितीच्या सभापती सुनंदा जोर्वेकर, लता डांगे, राज्य काँग्रेसच्या सरचिटणीस उत्कर्षा ताई रूपवते, अर्चना बालोडे, प्रमिला अभंग, निर्मलाताई गुंजाळ, इंद्रजीत थोरात आदी उपस्थित होते.

यावेळी सर्व महिलांना सन्मानपत्र, जेवणाचे डबे,आरोग्य कार्ड,एकविराची आरोग्य पुस्तिका यांसह आरोग्य किट देऊन सन्मानित करण्यात आले.

याप्रसंगी बोलताना यशोमती ठाकूर म्हणाल्या की, राज्यात महाविकास आघाडी सरकारने स्त्री – पुरुष समानतेसाठी सर्वसमावेशक असे नवीन महिला धोरण राबविले आहे. महिलांना आरक्षणापेक्षा आदर मिळाला पाहिजे. यासाठी सर्वत्र काम होणे गरजेचे आहे.

अंगणवाडी सेविका, आशा सेविका, मदतनीस यांनी कोरोना संकटांमध्ये केलेले काम अत्यंत कौतुकास्पद आहे. राज्यभरातील या सर्व भगिनीसाठी आगामी काळात बाळासाहेब थोरात यांच्या नेतृत्वाखाली त्यांना एलआयसी योजना, पेन्शन योजना लागू व्हावी यासाठी धोरण ठरविण्यात आले आहे. सर्व महिला भगिनींचा पगारवाढ लवकरच केली जाणार आहे. तसेच बाल संगोपनासाठी २ हजार ५०० रुपये दिले जात असून ते ५ हजार रुपये होण्याकरता सरकारकडे पाठपुरावा केला जाणार आहे. डीपीडीसी मधून महिला बालकल्याण व आशा सेविकांच्या व्यवस्थेसाठी तीन टक्के निधी राखीव केला जाणार असल्याचेही त्या म्हणाल्या.

तर महसूल मंत्री थोरात म्हणाले की, राजीव गांधी यांनी देशामध्ये सर्वप्रथम महिलांना ३३ टक्के आरक्षण देण्याचा निर्णय घेतला. राज्य पातळीवर हे आरक्षण ५० टक्के केले गेले असून महिलांना संधी मिळाली तर ते अत्यंत यशस्वीपणे कार्यभार सांभाळतात. कोरोना या संकट काळामध्ये आशा सेविका व अंगणवाडी सेविका यांनी अत्यंत मोलाचे काम केले असून गावातील प्रत्येक घरादारातील सुख दुःखात या महिला भगिनी सहभागी होत असतात. गावांचे आरोग्य जपणे यामध्ये या महिलांचे मोठे काम असून त्यांच्या पगारवाढीच्या मागणी बाबत आपण सकारात्मक असून सरकारकडे याबाबत पाठपुरावा करणार आहे. यशोमती ठाकूर हया अत्यंत कार्यक्षम महिला नेतृत्व असून त्यांनी या विभागाला एक नवी झळाळी दिली आहे. एकविरा फाउंडेशनच्या माध्यमातून डॉ.जयश्री व युवतींनी गावागावात पोहोचून केलेले काम कौतुकास्पद असल्याचेही ते म्हणाले.

तर आमदार डॉ.तांबे म्हणाले की, महिला सशक्त झाली तर देश सशक्त होणार आहे. समाजातील शेवटचा घटक विकसित होण्यासाठी शासन काम करत असून उपेक्षित घटकांना मुख्य प्रवाहात आणण्यासाठी डॉ.जयश्री थोरात यांच्या माध्यमातून एकविरा फाउंडेशन हे नक्कीच महिलांचे आरोग्य जपण्यासाठी काम करील असा विश्वास व्यक्त केला आहे.

दुर्गाताई तांबे म्हणाल्या की, कोरोना संकटात काम करणाऱ्या महिला भगिनींचा संगमनेरात होत असलेला कौतुकसोहळा हा देशातील एकमेव कौतुकसोहळा असावा. यातून काम करणाऱ्या महिलांना नक्कीच प्रोत्साहन मिळणार असून प्रत्येक महिलेने आगामी काळात प्रत्येक घराघरात जाऊन आहार बाबद जनजागृती करावी असे आवाहन केले.

यावेळी प्रांताधिकारी डॉ.शशिकांत मंगरुळे, तहसीलदार अमोल निकम, गटविकास अधिकारी अनिल नागणे, तालुका वैद्यकीय अधिकारी डॉ.सुरेश घोलप, कुकडे, एकविराच्या सदस्य डॉ.वृषाली साबळे, सुरभी मोरे, शिल्पा गुंजाळ, प्राजक्ता घुले, अहिल्या ओहोळ, ऐश्वर्या वाकचौरे, ज्योती थोरात, पूजा थोरात, मिताली भडांगे, आदिती झंवर, जानवी कळसकर, मयुरी थोरात, अर्चना नवले यांच्यासह महिला कार्यकर्त्या मोठ्या संख्येने उपस्थित होत्या.

कार्यक्रमाचे प्रास्ताविक एकविरा फाउंडेशन च्या संस्थापक अध्यक्ष डॉ.जयश्री थोरात यांनी केले. सूत्रसंचालन आदिती खोजे व वैष्णवी कापसे यांनी केले तर प्राजक्ता घुले यांनी आभार मानले.

डॉ.जयश्री थोरात यांचे महिला आरोग्याबाबतचे काम प्रशंसनीय

डॉ.जयश्री थोरात या महिलांच्या आरोग्याबाबत सतत सतर्क असून त्या राज्य पातळीवर महिलांच्या आरोग्याबाबत सातत्याने विविध विषयांवर सहभाग घेऊन आपले मत व्यक्त करत असतात. संगमनेर तालुक्यातही त्यांनी महिलांसाठी केलेले काम हे कौतुकास्पद असल्याचे गौरवोद्गार यशोमती ठाकूर यांनी काढले आहे.

अंगणवाडी व आशा सेविकासाठी मोफत आरोग्य तपासण्या

एसएमबीटी सेवाभावी हॉस्पिटलच्या वतीने तालुक्यातील सर्व आशासेविका,अंगणवाडी सेविका, आरोग्य सेविका, व मदतनीस यांच्या आठ तपासण्या मोफत केल्या जाणार असून घरातील एक व्यक्ति किंवा नातेवाईक महिलांची ही तपासणी मोफत होणार आहे. या सर्वांना दर शनिवारी एसएमबीटी हॉस्पिटलला जाण्यासाठी एसटी बसची सुविधा उपलब्ध करून देण्यात येणार आहे. याचबरोबर या सर्व महिला भगिनींनी संगमनेर तालुक्यातील अग्रमानांकित अशा सहकारी शिखर संस्थांना भेट देण्यासाठी व्यवस्था करण्यात येईल असे मंत्री थोरात यांनी म्हटले आहे.