घारगाव पोलिसांच्या कारभारावर प्रश्नचिन्ह ; पठार भागात तणावाची ठिणगी

दोन समाजांतील वाद चिघळला ; कारवाईतील कथित दुजाभावाविरोधात ‘रास्ता रोको’

संगमनेर / प्रतिनिधी : 

घारगाव पोलीस ठाण्याच्या हद्दीतील पठार भागात दोन समाजांतील वादाच्या पार्श्वभूमीवर कायदा-सुव्यवस्थेचा प्रश्न गंभीर बनला आहे. पोलिसांनी दोन्ही बाजूंकडून प्राप्त तक्रारींवरून गंभीर स्वरूपाचे गुन्हे दाखल केल्याने वातावरण अधिकच तापले असून, पोलिसांच्या कारवाईत कथित दुजाभाव होत असल्याचा आरोप स्थानिकांकडून केला जात आहे. या पार्श्वभूमीवर पोलिसांच्या भूमिकेच्या निषेधार्थ पठार भागात ‘रास्ता रोको’ आंदोलन पुकारण्यात आले आहे. विशेष म्हणजे पोलीस निरीक्षकांच्या भूमिकेवर दोन्हीकडून नाराजी व्यक्त होत असून या सर्व घडामोडी तेच जबाबदार असल्याचे बोलले जात आहे

करण्यात येत असलेल्या आरोपांनुसार, संबंधित प्रकरण हाताळताना घारगाव पोलीस ठाण्याच्या पोलीस निरीक्षकांनी परिस्थितीची पुरेशी पडताळणी आणि वरिष्ठ अधिकाऱ्यांशी समन्वय न साधता घाईघाईने गुन्हे दाखल केले. रात्री उशिरापर्यंत पोलीस ठाण्यात दोन्ही बाजूंकडून आलेल्या तक्रारींची प्रक्रिया सुरू होती. या कारवाईदरम्यान राजकीय अथवा सामाजिक दबाव होता का, तक्रारींची स्वतंत्रपणे पडताळणी करण्यात आली का आणि दोन्ही प्रकरणांमध्ये समान निकष वापरण्यात आले का, याबाबत प्रश्न उपस्थित झाले आहेत.

पोक्सो, ॲट्रॉसिटीसह गंभीर कलमांचा समावेश

या वादातून दाखल झालेल्या परस्परविरोधी गुन्ह्यांमध्ये पोक्सो कायदा आणि अनुसूचित जाती व अनुसूचित जमाती (अत्याचार प्रतिबंधक) कायद्यांतर्गत कलमांसह विनयभंग, मारहाण, दुखापत, घरफोडी अथवा चोरीसह विविध गंभीर स्वरूपाच्या आरोपांचा समावेश असल्याचे सांगण्यात येत आहे. दोन्ही बाजूंच्या तक्रारींमध्ये मिळून दहापेक्षा अधिक व्यक्तींना आरोपी करण्यात आल्याची माहिती समोर येत आहे.

एका बाजूला तत्पर कारवाई, दुसऱ्या बाजूला विलंबाचा आरोप

मुख्य आक्षेप पोलिसांच्या कारवाईतील कथित असमानतेवर आहे. एका बाजूच्या तक्रारीवरून दाखल झालेल्या गुन्ह्यातील काही आरोपींवर तातडीने अटक कारवाई करण्यात आली. मात्र दुसऱ्या बाजूच्या तक्रारीतील संबंधित व्यक्तींवर त्याच वेगाने कारवाई झालेली नसल्याचा आरोप करण्यात येत आहे.

या कथित फरकामुळे दोन्ही गटात आणि समाजात असंतोष वाढला असून, पोलिसांनी दोन्ही बाजूंना समान कायदेशीर निकष लावावेत, अशी मागणी केली जात आहे. तपास निष्पक्ष आहे की नाही, याची वरिष्ठ पातळीवरून पडताळणी करण्याची मागणीही पुढे आली आहे. 

वरिष्ठ अधिकाऱ्यांच्या भूमिकेकडे लक्ष

या संपूर्ण प्रकरणात पोलीस निरीक्षकांनी वरिष्ठ पोलीस अधिकाऱ्यांशी पुरेसा समन्वय साधला होता का, संबंधित तक्रारींची प्राथमिक चौकशी आणि उपलब्ध पुराव्यांचे परीक्षण झाले होते का, तसेच गंभीर कलमे लावताना आवश्यक कायदेशीर प्रक्रिया पूर्ण झाली का, याची चौकशी होण्याची मागणी ग्रामस्थांकडून होत आहे.

पोलिसांच्या कथित भूमिकेच्या निषेधार्थ पठार भागात ‘रास्ता रोको’ आंदोलन करण्यात येत आहे. त्यामुळे प्रमुख मार्गावरील वाहतूक विस्कळीत होण्याची शक्यता असून, पोलिसांसमोर कायदा-सुव्यवस्था राखण्याचे आव्हान निर्माण झाले आहे.

आंदोलनाच्या पार्श्वभूमीवर प्रशासनाने परिस्थिती संवेदनशीलतेने हाताळावी आणि कोणत्याही समाजाविरुद्ध अथवा कोणत्याही व्यक्तीविरुद्ध पूर्वग्रह न ठेवता कायद्याच्या चौकटीत कारवाई करावी, अशी अपेक्षा व्यक्त होत आहे.

या प्रकरणाची वरिष्ठ अधिकाऱ्यांमार्फत स्वतंत्र चौकशी करावी, दोन्ही बाजूंच्या तक्रारींची समान निकषांवर तपासणी करावी, तपासातील त्रुटी दूर कराव्यात आणि दोष आढळल्यास संबंधित अधिकाऱ्यांवर नियमानुसार कारवाई करावी, अशी मागणी करण्यात येत आहे.