मुक्या प्राण्यांसाठी झटणाऱ्यांनाच मानसिक त्रास !

संगमनेरमध्ये कुत्र्यांच्या पालन-पोषणासाठी काम करणाऱ्या मिथुन अडांगळे यांना कथित फोनद्वारे त्रास ; पोलिसांनी ‘गावगुंडगिरी’ला आळा घालण्याची मागणी

संगमनेर | प्रतिनिधी

मुक्या प्राण्यांसाठी काम करणाऱ्या व्यक्तींना प्रोत्साहन देण्याऐवजी त्यांच्यावरच दबाव आणण्याचा प्रकार सुरू असल्याचा गंभीर आरोप समोर आला आहे. मुक्या प्राण्यांसाठी काम करणारे नितेश खरे यांच्या व्हिडिओच्या पार्श्वभूमीवर संगमनेरमध्ये कुत्र्यांचे पालन-पोषण व संवर्धनासाठी स्थानिक पातळीवर काम करणारे मिथुन अडांगळे यांना कथितरीत्या फोन करून प्रचंड मानसिक त्रास दिला जात असल्याचे सांगण्यात येत आहे.

कुत्र्यांसह मुक्या प्राण्यांच्या देखभालीसाठी अडांगळे हे आपल्या पातळीवर सातत्याने प्रयत्न करीत असल्याचे सांगितले जाते. मात्र, या कामाच्या पार्श्वभूमीवरच त्यांना फोन करून दबाव निर्माण केला जात असेल, तर हा प्रकार निश्चितच गंभीर आहे.

मुक्या जीवांसाठी काम करायचे तर मानसिक त्रास सहन करायचा का? असा संतप्त सवाल आता उपस्थित होत आहे.

सामाजिक कार्य करणाऱ्या व्यक्तींना फोनवरून धमकावणे, दबाव आणणे किंवा मानसिक त्रास देण्याचा प्रयत्न होत असेल तर अशा प्रकारांकडे प्रशासनाने गांभीर्याने पाहण्याची गरज आहे. कायदा हातात घेण्याचा प्रयत्न करणाऱ्या प्रवृत्तींना वेळीच लगाम घातला नाही, तर भविष्यात सामाजिक कार्य करणाऱ्यांचे मनोबल खच्ची होण्याची शक्यता आहे.

दरम्यान, मिथुन अडांगळे यांना कथितरीत्या त्रास देणाऱ्या व्यक्तींची चौकशी करून सत्य परिस्थिती समोर आणावी, तसेच तक्रारीत तथ्य आढळल्यास संबंधितांवर कायदेशीर कारवाई करावी, अशी मागणी होत आहे.

पोलिसांनी सहकार्य करावे आणि कायद्याच्या चौकटीत राहून अशा कथित ‘गावगुंडगिरी’ला तातडीने आळा घालावा, अशी अपेक्षा मुक्या प्राण्यांसाठी काम करणाऱ्या नागरिकांकडून व्यक्त केली जात आहे.

मुक्या प्राण्यांसाठी आवाज उठवणाऱ्यांचा आवाज दाबण्याचा प्रयत्न होत असेल, तर हा केवळ एका व्यक्तीचा प्रश्न राहत नाही; तर समाजातील संवेदनशीलतेसमोर उभे राहिलेले हे गंभीर आव्हान आहे.