संगमनेर कृषी उत्पन्न बाजार समितीचा राज्यस्तरीय सन्मान !

नाशिक विभागातून द्वितीय क्रमांक तर जिल्ह्यातून प्रथम क्रमांक

प्रतिनिधी —

काँग्रेस विधिमंडळ पक्षाचे नेते माजी कृषी व महसूल मंत्री आमदार बाळासाहेब थोरात यांच्या मार्गदर्शनाखाली कार्यरत असलेल्या व अत्याधुनिक सुविधांसह शेतकऱ्यांसाठी गुणवत्ता व पारदर्शकपणे काम करणाऱ्या संगमनेर कृषी उत्पन्न बाजार समितीचा चांगल्या कामामुळे अहमदनगर जिल्ह्यातून प्रथम तर राज्यस्तरावर चतुर्थ क्रमांक आणि नाशिक विभागातून द्वितीय क्रमांक मिळाला असल्याची माहिती सभापती शंकर खेमनर व सचिव सतीश गुंजाळ यांनी दिली आहे.

महाराष्ट्र सरकारच्या पणन विभागाच्या वतीने बाळासाहेब ठाकरे कृषी व्यवसाय व ग्रामीण परिवर्तन प्रकल्पांतर्गत (SMART) जागतिक बँकेच्या अर्थसहाय्याने राज्यातील सर्व बाजार समित्यांची  वार्षिक क्रमवारी प्रमाणित केली जाते. यामध्ये प्रपत्र व सहाय्यक निबंधक  यांनी तपासणी करून निकषानुसार गुणांकन केले जाते. यानुसार सन २०२१ – २२ साठी महाराष्ट्र राज्यातून संगमनेर कृषी उत्पन्न बाजार समितीला चतुर्थ क्रमांक मिळाला आहे. तर नाशिक विभागातून द्वितीय व सहकाराची पंढरी असलेल्या अहमदनगर जिल्ह्यातून प्रथम क्रमांक मिळाला आहे.

हा पुरस्कार संगमनेरचा राज्य पातळीवर लौकिक वाढवणारा ठरला आहे. संगमनेर कृषी उत्पन्न बाजार समितीने सातत्याने शेतकऱ्यांसाठी नवनवीन उपक्रम राबवले असून अत्याधुनिक व डिजिटल यंत्रणा उभी केली आहे. स्वच्छतेसह शेतकरी व व्यापाऱ्यांसाठी सुविधा संगणकीकृत कामकाज, उपबाजार समिती यामुळे तालुक्यातील व इतर तालुक्यां मधील शेतकरी ही आपला उत्पादित शेतीमाल  याच बाजार समितीत घेऊन येतात.

बाळासाहेब ठाकरे कृषी व्यवसाय व ग्रामीण परिवर्तन प्रकल्पांतर्गत बाजार समितीतून शेतकऱ्यांसाठी असलेल्या पायाभूत सुविधा आर्थिक व वैतानिक वैधानिक कामकाज, शेतकऱ्यांसाठी सातत्याने राबवलेल्या योजना, विविध उपक्रम या सर्वांचा आढावा घेतला जातो. या विविध गुणांच्या निकषानुसार संगमनेर बाजार समितीला नाशिक विभागातून द्वितीय तर राज्य स्तरावरून चतुर्थ क्रमांक मिळाला आहे. यामध्ये एकूण ३०५ बाजार समित्यांनी सहभाग नोंदवला होता.

बाजार समितीच्या या यशाबद्दल मार्गदर्शक आमदार बाळासाहेब थोरात, आमदार डॉ. सुधीर तांबे, दुर्गाताई तांबे, बाजीराव खेमनर, ॲड. माधवराव कानवडे, रणजीतसिंह देशमुख, सत्यजित तांबे, डॉ. जयश्री थोरात, बाजार समितीचे अध्यक्ष शंकर खेमनर, इंद्रजीत थोरात, बाबा ओहोळ, लक्ष्मणराव कुटे, संपतराव डोंगरे, अमित पंडित, रामहरी कातोरे यांसह विविध पदाधिकाऱ्यांनी बाजार समितीचे चेअरमन,  सर्व संचालक व सचिव सतीश गुंजाळ यांचे अभिनंदन केले आहे.