जिल्हा बँक सोसायटी कर्ज वसुलीमधे संगमनेर तालुका पहिल्या स्थानावर
१७ सोसायट्यांची मेंबर पातळीवर १०० टक्के वसुली तर १३३ सोसायट्यांची बँक पातळीवर १०० टक्के वसुली..
प्रतिनिधी —
सहकारातून समृद्धी निर्माण करत विकासाचे मॉडेल ठरलेल्या संगमनेर तालुक्याने याही वर्षी सेवा सोसायट्यांमध्ये आपल्या कर्ज फेडीची परंपरा कायम ठेवत ९९.८२ टक्के इतकी वसुली देत जिल्ह्यात प्रथम क्रमांक ठेवला असल्याची माहिती तालुका विकास अधिकारी अशोक थोरात यांनी दिली आहे.
सहकार हे गोरगरिबांच्या विकासाचे महत्त्वपूर्ण माध्यम आहे. सहकार महर्षी भाऊसाहेब थोरात यांच्या आदर्श तत्त्वावर संगमनेर तालुक्याने सहकारातून समृद्धी निर्माण केली असून आमदार बाळासाहेब थोरात यांच्या नेतृत्वाखाली संगमनेर तालुका हा विकासातून सर्व क्षेत्रात अग्रभागी राहिला आहे. अहमदनगर जिल्हा सहकारी बँक ही जिल्ह्याची आर्थिक कामधेनू असून सेवा सोसायटीच्या माध्यमातून शेतकरी, गोरगरीब यांना बँकेने सातत्याने कर्ज पुरवठा केला आहे.
थोरात यांच्या नेतृत्वामुळे या बँकेवर जिल्ह्यातील सर्व सभासद, ठेवीदार, शेतकरी यांचा मोठा विश्वास आहे. संगमनेर तालुक्याने आपल्या कर्जफेडीची उज्वल परंपरा कायम ठेवत तालुक्यातील १७ सेवा सोसायटी यांनी मेंबर पातळीवर शंभर टक्के वसुली दिली आहे.
यामध्ये निंबाळे, घुलेवाडी, मालदाड, कुंभारवाडी, जोर्वे, शिरसगाव धुपे, आनंदवाडी, पिंपळगाव माथा, देवकौठे, कौटेवाडी, आंबी दुमाला, म्हसवंडी, वडझरी, खराडी, चिखली, मिरपुर, निमगाव भोजापूर या गावांचा समावेश आहे. तर इतर १३३ सेवा सोसायटी यांनी बँक पातळीवर शंभर टक्के वसुली दिली आहे .यामुळे तालुक्याची वसुली ही ९९.८२ टक्के राहिली असून अहमदनगर जिल्ह्यातून संगमनेर तालुक्याचा कर्ज वसुलीमध्ये प्रथम क्रमांक मिळाला आहे .
या कर्ज वसुलीसाठी शेतकऱ्यांमध्ये सातत्याने प्रबोधन करताना आमदार बाळासाहेब थोरात व आमदार डॉ. सुधीर तांबे, चेअरमन उदय शेळके यांच्या मार्गदर्शनाखाली जिल्हा बँकेचे उपाध्यक्ष ॲड. माधवराव कानवडे, संचालक गणपतराव सांगळे, मुख्य कार्यकारी अधिकारी रावसाहेब वर्पे, तालुका विकास अधिकारी अशोक थोरात, वसुली अधिकारी उल्हास शिंदे, तालुका सचिव प्रकाश कडलग यांचेसह विविध पदाधिकाऱ्यांनी गावोगावी सातत्याने बैठका घेऊन कर्ज वसुलीसाठी विशेष परिश्रम घेतले आहे. यामुळे तालुक्याची कर्ज वसुली ही झाली आहे. या सर्व वसुली कामांमध्ये संगमनेर तालुक्यातील सर्व सेवा सोसायटीचे चेअरमन, व्हा. चेअरमन, संचालक मंडळ, सचिव, जिल्हा बँकेचे शाखाधिकारी ,अधिकारी, कर्मचारी यांनी विशेष परिश्रम घेतले. तसेच सहकार महर्षी भाऊसाहेब थोरात सहकारी साखर कारखाना, संगमनेर तालुका दूध संघ, शेतकी संघ, मार्केट कमिटी या संस्थांनी ही कर्जदार शेतकऱ्यांचा वसुली करण्यासाठी मोलाचे सहकार्य केले आहे .