‘ज्यांचा इतिहास-भूगोल नाही, त्यांनी सोनिया गांधींवर बोलू नये’ ; पुस्तक फाडण्याच्या प्रकारावर बाळासाहेब थोरात यांचा हल्लाबोल
संगमनेर टाइम्स न्यूज नेटवर्क –
काँग्रेसच्या ज्येष्ठ नेत्या व खासदार सोनिया गांधी यांच्या ‘बिलॉन्गिंग : अ जर्नी ऑफ लव्ह’ (Belonging: A Journey of Love) या आत्मचरित्रात्मक पुस्तकाच्या प्रती काही जणांकडून फाडण्यात आल्याच्या घटनेचे तीव्र पडसाद उमटले आहेत. या घटनेचा निषेध करताना काँग्रेसचे विधिमंडळ पक्षनेते तथा माजी मंत्री बाळासाहेब थोरात यांनी आक्रमक भूमिका घेत विरोधकांवर जोरदार निशाणा साधला आहे. “सत्तेच्या लोभापोटी अनेक पक्ष बदलणाऱ्या आणि स्वतःचा कोणताही इतिहास-भूगोल नसलेल्यांनी सोनिया गांधींच्या जीवनप्रवासावर भाष्य करणे हास्यास्पद आहे,” अशा शब्दांत थोरात यांनी विरोधकांना खडेबोल सुनावले आहेत.
पुस्तक फाडणे म्हणजे प्रसिद्धी मिळवण्याचा केविलवाणा प्रयत्न
या प्रकरणावर सविस्तर प्रतिक्रिया देताना माजी मंत्री बाळासाहेब थोरात म्हणाले की, लोकशाहीमध्ये कोणत्याही पुस्तकातील विचारांशी मतभेद असू शकतात आणि ते कायदेशीर मार्गाने मांडण्याचा प्रत्येकाला अधिकार आहे. मात्र, त्यासाठी पुस्तक वाचून त्यातील मुद्द्यांवर बौद्धिक चर्चा करणे गरजेचे असते. केवळ स्वस्त प्रसिद्धी मिळवण्यासाठी पुस्तक फाडण्यासारखे कृत्य करणे अत्यंत दुर्दैवी आणि निंदनीय आहे.

या निषेध आंदोलनात व कृत्यात आघाडीवर असलेल्या नेत्यांच्या राजकीय वर्तनावर बोट ठेवताना थोरात यांनी कडाडून टीका केली. ते म्हणाले, “या कृतीत पुढे असलेले बहुतांश लोक सत्तेच्या जवळ राहण्यासाठी आणि स्वार्थासाठी अनेक पक्ष फिरून आलेले आहेत. ज्यांना स्वतःचा असा कोणताही ठोस राजकीय इतिहास किंवा भूगोल नाही, अशा लोकांनी सोनियाजींच्या त्यागावर आणि जीवनप्रवासावर बोलणे म्हणजे निव्वळ हास्यास्पद आहे. सार्वजनिक जीवनात वैचारिक मतभेद असले तरी किमान सुसंस्कृतपणा आणि राजकीय शिष्टाचार जपला गेला पाहिजे.”
सोनिया गांधी यांच्या राजकीय व वैयक्तिक प्रवासाची साक्ष देताना थोरात पुढे म्हणाले, “आम्ही सोनियाजींचा त्याग, त्यांचा खडतर संघर्ष आणि देशाप्रती असलेले अफाट समर्पण अतिशय जवळून पाहिले आहे. या पुस्तकाच्या माध्यमातून त्यांचा हाच प्रेरणादायी प्रवास त्यांच्या स्वतःच्या शब्दांत वाचकांसमोर आला आहे. अशा तुच्छ प्रकारांमुळे पुस्तकाबद्दलचा रोष निर्माण होईल असे विरोधकांना वाटत असले, तरी यामुळे उलट वाचकांची उत्सुकता वाढेल आणि अधिक मोठ्या संख्येने लोक हे पुस्तक वाचतील, असा मला ठाम विश्वास आहे.”
या प्रतिक्रियेमुळे राजकीय वर्तुळात या प्रकरणावरून नव्या वादाला तोंड फुटण्याची दाट शक्यता निर्माण झाली आहे.


