लडाखचे प्रश्न अन् ‘NEET’ पेपरफुटी ; सोनम वांगचुक यांचे दिल्लीत बेमुदत उपोषण, प्रकृती खालावली

संगमनेर टाइम्स न्यूज नेटवर्क –

प्रख्यात पर्यावरणवादी, शिक्षणतज्ज्ञ आणि लडाखचे सामाजिक कार्यकर्ते सोनम वांगचुक हे दिल्लीतील जंतर-मंतर येथे बेमुदत उपोषण करत असून, त्यांच्या प्रकृतीत सातत्याने बिघाड होत असल्याची माहिती समोर आली आहे. केवळ पाण्यावर सुरू असलेल्या या उपोषणामुळे त्यांचे वजन सुमारे ८.५ किलोने घटल्याचे सांगितले जात आहे. डॉक्टरांचे पथक त्यांच्या प्रकृतीवर सातत्याने लक्ष ठेवून असून, देशभरातून त्यांच्या आरोग्याबाबत चिंता व्यक्त केली जात आहे.

वांगचुक यांनी २८ जूनपासून आंदोलन सुरू केले असून, लडाखला विशेष संवैधानिक संरक्षण मिळावे आणि देशातील शिक्षण व्यवस्थेतील त्रुटींविरोधात सरकारने ठोस भूमिका घ्यावी, या प्रमुख मागण्यांसाठी ते आंदोलन करत आहेत.

दीर्घकाळ अन्नत्याग केल्यामुळे वांगचुक यांची शारीरिक अवस्था खालावली आहे. त्यांना चालतानाही त्रास होत असल्याचे सांगितले जात आहे. या पार्श्वभूमीवर त्यांना सक्तीने अन्न देण्याबाबत (Force Feeding) दिल्ली उच्च न्यायालयात जनहित याचिका दाखल करण्यात आली असून, न्यायालयाने केंद्र सरकारला यासंदर्भात उत्तर सादर करण्याचे निर्देश दिले आहेत.

देशभरात गाजलेल्या NEET पेपरफुटी प्रकरणाची सखोल चौकशी करून दोषींवर कठोर कारवाई करावी तसेच या प्रकरणाची नैतिक जबाबदारी स्वीकारून केंद्रीय शिक्षण मंत्री धर्मेंद्र प्रधान यांनी राजीनामा द्यावा, अशी मागणी आंदोलनातून करण्यात आली आहे. विद्यार्थी आंदोलनालाही वांगचुक यांनी जाहीर पाठिंबा दिला आहे.

लडाखच्या पर्यावरणाचे, स्थानिक संस्कृतीचे आणि नैसर्गिक संसाधनांचे संरक्षण करण्यासाठी लडाखला पूर्ण राज्याचा दर्जा देण्यात यावा तसेच भारतीय संविधानाच्या सहाव्या परिशिष्टात त्याचा समावेश करण्यात यावा, ही त्यांच्या आंदोलनातील दुसरी महत्त्वाची मागणी आहे.

सोनम वांगचुक यांच्या आंदोलनाला देशभरातील विद्यार्थी, सामाजिक कार्यकर्ते, विविध संघटना आणि अनेक राजकीय नेत्यांनी पाठिंबा दर्शविला आहे. अनेकांनी त्यांच्या प्रकृतीची चिंता व्यक्त करत उपोषण मागे घेण्याचे आवाहन केले असले, तरी वांगचुक यांनी मागण्या मान्य होईपर्यंत आंदोलन सुरू ठेवण्याचा निर्धार व्यक्त केला आहे.

वांगचुक यांच्या प्रकृतीत होत असलेली घसरण आणि वाढता जनसमर्थन यामुळे या आंदोलनाकडे देशाचे लक्ष लागले आहे. केंद्र सरकार त्यांच्या मागण्यांवर काय निर्णय घेते आणि या आंदोलनावर कोणती भूमिका घेते, याकडे सर्वांचे लक्ष लागून राहिले आहे.