कोल्हेवाडी पाणी पुरवठा योजनेसाठी २७  कोटी ६३ लाख रुपयांचा निधी मंजूर 

प्रतिनिधी —

महसूल मंत्री बाळासाहेब थोरात यांच्या प्रयत्नांतून संगमनेर तालुक्यातील कोल्हेवाडी गावासाठी जलजीवन मिशन कार्यक्रमांतर्गत पाणीपुरवठा योजनेकरिता २७ कोटी ६३ लाख रुपयांचा निधी मंजूर झाला असल्याची माहिती थोरात कारखान्याचे संचालक इंद्रजित थोरात व कोल्हेवाडी गावचे सरपंच दत्तात्रय खुळे यांनी दिली आहे.

याबाबत अधिक माहिती अशी की, महसूल मंत्री बाळासाहेब थोरात यांनी प्रत्येक गावच्या विकासासाठी सातत्याने विविध योजना राबवल्या आहेत. संगमनेर तालुक्यात तळेगाव, निमोण, राजापूर, पानोडी, धांदरफळ या गावांसह अनेक प्रादेशिक पाणीपुरवठा योजना कार्यान्वित आहेत.

कोल्हेवाडी या गावची लोकसंख्या जास्त असून या गावातील नागरिकांना स्वच्छ व मुबलक पाणी मिळावे यासाठी ग्रामपंचायत व कोल्हेवाडी येथील अनेक कार्यकर्त्यांनी सातत्याने पाठपुरावा केला होता.

थोरात यांनी मंत्रिमंडळात पाठपुरावा  करून कोल्हेवाडी गावासाठी जल जीवन मिशन कार्यक्रमाअंतर्गत पाणी पुरवठा योजनेसाठी भरीव निधी मिळाला आहे. याकामी पाणी पुरवठा मंत्री गुलाबराव पाटील यांचे मोलाचे सहकार्य लाभले असून त्यांनी या योजनेच्या प्रशासकीय मान्यतेचे पत्र आज २७ जानेवारी रोजी मुंबई येथे सुपूर्द केले.
या निधीमुळे कोल्हेवाडी गावात पाणीपुरवठा योजना लवकरच कार्यान्वित होणार आहे.

हा भरीव निधी मिळाल्याबद्दल महसूलमंत्री बाळासाहेब थोरात यांचे कोल्हेवाडी गावातील विविध संस्थांचे प्रतिनिधी, ग्रामस्थ, तरुण मंडळ, कार्यकर्ते व समस्त ग्रामस्थांनी आभार व्यक्त केले आहेत.