कळसुबाई – हरिश्चंद्रगड अभयारण्यात भटक्यांच्या पंढरीत भटक्यांचे संमेलन !

प्रतिनिधी —

कळसुबाई हरिश्चंद्रगड अभयारण्यात वन्यजीव सप्ताहनिमित्त भटक्यांच्या पंढरीत भटक्यांचे संमेलन घाटघर इको-सिटी येथे आयोजित करण्यात आले. सदर संमेलनाचे उदघाटन मुंबई येथील प्रसिद्ध गिर्यारोहक राजेश गाडगीळ, नाशिक येथील गिर्यारोहक संजय अमृतकर, डॉ.नितिन बस्ते, पुण्याचे ओंकार ओक, संगमनेरचे श्रीकांत कासट, रमाकांत डेरे व सहाय्यक वनसंरक्षक गणेश रणदिवे यांच्या हस्ते करण्यात आले.

सदर शिबीरात गिर्यारोहण करणारे तज्ज्ञ तसेच स्थानिक आदिवासी युवक व गाईड आणि वनविभाग या तीनही घटकांनी एकत्र येवुन शाश्वत पर्यटन करणे व पर्यटकांना सोई सुविधा देणे यावर चर्चा झाली.

राजेश गाडगीळ यांनी स्थानिक युवकांना आपली गुणवत्ता वाढवून पर्यटकांना चांगली सुव्यवस्था देणेबाबत सांगितले. तसेच डॉ.बस्ते यांनी सदर क्षेत्रात रॅपलींग अकॅडमी, योगासेंटर व विविध विषयांचे फोटोग्राफी इव्हेंट चालू करण्यासाठी सुचना केली. यासाठी भंडारदरा परिसर योग्य असुन सदर कामे झाल्यास पर्यटनाला चालना मिळेल असे सांगितले.

श्रीकांत कासट यांनी गडकिल्यांचे जतन करणे आवश्यक असून गडकिल्यांचे पावित्र्य राखावे अशी सूचना केली. तर डॉ. हेमंत बोरसे यांनी वनविभाग व ग्रामस्थ एकत्र आल्यास फार मोठा बदल घडवू शकतात असे सांगून पर्यटन वाढीसाठी सर्वांनी प्रयत्न करण्याचे गरजेचे असल्याचे आवाहन केले.

स्थानिक ग्रामस्थ व पर्यटनाचा व्यवसाय करणाऱ्या तरुणांनी पर्यटन वाढीसाठी वनविभागास सहकार्य करणार असल्याचे सांगितले. संजय अमृतकर यांनी शिक्षित गाईड असायलाचं हवेत. त्यासाठी प्रशिक्षण शिबरे व साहसी शिक्षण घेऊन त्यासाठी प्रयत्न करायला हवेत असे नमूद केले.

सहाय्यक वनसंरक्षक गणेश रणदिवे यांनी अभयारण्यात पर्यटन वाढीसोबत वन्यजीवांचे संरक्षण व संवर्धन तसेच निसर्गाचा समतोल राखणे गरजेचे असल्याचे सांगून त्यासाठी स्थानिक व पर्यटक यांचा समन्वय साधण्यासाठी वनविभाग प्रयत्नशील असल्याचे म्हटले.

कार्यक्रमात आदिवासी नृत्य सादर करुन स्थानिक आदिवासी संस्कृतीची ओळख सगळयांना करुन दिली. सुत्रसंचलन दत्तात्रय पडवळे यांनी केले. अमोल आडे यांनी केले. कार्यक्रमाच्या यशस्वीतेसाठी बी .एस.मुठे, वनपाल, आर. एम. सोनार, एम.जी. पाटील, वनरक्षक, जी.ए. दिवे, सी.बी. तळपाडे, ए.आर.शिंदे, एम. ए. सरोदे, वनरक्षक यांनी सहकार्य केले.