घारगाव येथे चोरट्यांनी एटीएम मशीन फोडले!
संगमनेर तालुक्यातील पठार भागात चोरट्यांचा धुमाकूळ सुरूच !!
१९ लाख १७ हजार ५०० रुपये लांबविले..
प्रतिनिधी —
संगमनेर तालुक्याच्या पठारभागात चोरट्यांचा धुमाकूळ थांबता थांबेना. अजूनही चोरी आणि घरफोड्यांचे सत्र सुरूच आहे. घारगाव येथील दौलत रिफ्रेशमेंट शेजारील भारतीय स्टेट बँकेचे एटीएम मशीन चोरट्यांनी फोडून २० लाख १७ हजार ५०० रुपये लांबविल्याची खळबळजनक घटना शुक्रवारी पहाटे घडली आहे. त्यामुळे बंद घरे व दुकानांपाठोपाठ चोरट्यांनी एटीएम मशिनही फोडल्याने आता या चोरट्यांचा शोध लावणे घारगाव पोलिसांपुढे मोठे आव्हान ठरले आहे.
याबाबत घारगाव पोलिसांनी दिलेली अधिक माहिती अशी, की घारगाव येथील दौलत रिफ्रेशमेंटच्या आवारात भारतीय स्टेट बँकेचे एटीएम मशीन आहे. दररोज असंख्य लोक रोख रक्कम काढण्यासाठी येथे असतात. दरम्यान, शुक्रवारी पहाटेच्या सुमारास अज्ञात चोरट्यांनी सीसीटीव्ही कॅमेऱ्याची वायर कापून एटीएम मशीनचा दरवाजा गॅस कटरच्या साहाय्याने कापला. त्यानंतर आतील लाखो रुपयांची रक्कम चोरुन पोबारा केला.
यावेळी चोरट्यांनी डीव्हीआर देखील चोरुन नेला आहे. या घटनेची माहिती समजताच पोलीस निरीक्षक सुनील पाटील, पोलीस नाईक राजेंद्र लांघे, संतोष फड, शाखा व्यवस्थापक कांचन दाभने आदिंनी घटनास्थळी धाव घेत पाहणी केली.