संगमनेर शहरात चोरट्यांचा धुमाकूळ !
घरफोड्या, चोऱ्या, चैन स्नॅचिंग, मोटार सायकल चोरी, आदी प्रकार वाढले
प्रतिनिधी —
संगमनेर शहरात गेल्या काही दिवसांपासून चोरट्यांनी अक्षरशः धुमाकूळ घातला असून शहरासह उपनगरात जबरी चोऱ्या, घरफोड्या, मोटर सायकल चोरी, महिलांच्या अंगावरील दागिन्यांची चोरी, बस स्थानकावर पाकीट मारी असे प्रकार वाढू लागल्याने सध्या शहर पोलीस ठाण्याच्या हद्दीत चोरट्यांनी सर्वसामान्य नागरिकांना सळो की पळो करून सोडले आहे. त्यातच अवैध धंद्यांना उत आल्याने पोलीस नेमके काय करतात असा सवाल उपस्थित झाला आहे.
शहराच्या विविध भागातून घडणाऱ्या या घटनांमुळे पोलीस ठाण्यात विविध गुन्ह्यांची नोंद झाली आहे. मध्यवस्तीत असणाऱ्या दुकानांमधून कापड, कपडे चोरी, रोख रक्कम, दुकानांचे शटर तोडून इलेक्ट्रिक साहित्य चोरणे, कॉम्प्युटर, सीसीटीव्ही असे साहित्य चोरून नेणे असे प्रकार घडले आहेत.
त्याचप्रमाणे संगमनेर बस स्थानकावर होणाऱ्या पाकीटमाऱ्या आणि दागिन्यांच्या चोऱ्यांना अद्याप पर्यंत आळा बसलेला नाही. बाहेरगावी जाणाऱ्या आणि प्रवास करणाऱ्या महिलांच्या गळ्यातील दागिने, पिशव्या आणि पर्स मधील दागिने तसेच पुरुषांच्या खिशातील पाकिटे चोरण्याचे प्रमाण सातत्याने वाढत आहे. बस स्थानकावर पोलीस कर्मचारी असून देखील हे प्रकार घडतच आहेत.
उपनगरांमध्ये बंद घरांची कुलपे तोडून घरामध्ये प्रवेश करून दागिन्यांची, पैशांची चोरी करून चोरट्यांनी अक्षरशः धुमाकूळ घातला आहे. शहर हद्दीत विविध भागात मोटरसायकलच्या चोऱ्यांचे प्रमाण वाढले आहे. अगदी रतीब घातल्याप्रमाणे मोटरसायकल चोरीचे गुन्हे दाखल होत आहेत. यावर कुठलाही आळा बसवण्यात पोलीस यशस्वी झालेले नाहीत.
यावर कळस म्हणजे संगमनेरच्या पाचवीला पुजलेले अवैध धंदे तर जोमाने सुरू आहेत. मटका, जुगार अड्डे, गांजा विक्री आणि कत्तलखाने यातून मिळणारा पैसा आणि त्यातून होणारे वाटप यामुळे या धंद्यांकडे पोलीस दुर्लक्ष करत आहेत. मटका किंग आणि मटका पेढ्या संगमनेर पासून जिल्ह्यात पसरलेल्या असल्याने त्यांच्यावर कारवाई करण्यास पोलिसांची टाळाटाळ होत आहे. या धंद्यांवर लवकरात लवकर कारवाई करून हे सर्व धंदे बंद करावेत अशी मागणी नागरिकांमधून होत आहे. संगमनेर शहराला कोणताही पोलीस अधिकारी आला तरी एक दोन महिन्यात या सर्व स्थिर स्थावर आणि नियोजन झाले की कुठलीही कारवाई होत नसल्याचे दिसून येते.
