संगमनेरात अवैध मार्गाने जमा केलेले 42 लाख रुपये पकडले 

अ.नगरच्या स्थानिक गुन्हे शाखेची कारवाई ; आरोपी गुजरातचे

प्रतिनिधी —

संगमनेर शहरातील भर वस्तीत बाजारपेठ परिसरात असलेल्या पार्श्वनाथ गल्लीत हवालामार्फत सरकारचा कर चुकवून जमा केलेले ४० लाख १५ हजार रुपये अहिल्यानगरच्या स्थानिक गुन्हे शाखेच्या पथकाने छापा टाकून पकडले असून संशयित आरोपीविरुद्ध गुन्हा दाखल केला आहे.

याबाबत स्थानिक गुन्हे शाखा यांच्याकडून देण्यात आलेल्या प्रसिद्धी पत्रकात म्हटले आहे की, स्थानिक गुन्हे शाखेचे पोलीस निरीक्षक दिनेश आहेर हे जिल्ह्यातील अवैध व्यवसाय करणाऱ्या इसमांची माहिती घेत असतांना गुप्त बातमीदाराकडून माहिती मिळाली की, संगमनेर शहरामध्ये सहदेव ज्वेलर्स येथे भावेश पटेल व आशीष सुभाष वर्मा हे साथीदारासह उत्पन्नापेक्षा जास्त रोख रक्कम शासनाचा कर भरणे आवश्यक असताना बेकायदेशीरपणे मोठया स्वरूपात रक्कम बाळगून हवालामार्फत विल्हेवाट लावत आहेत.

अशी खात्रीशिर माहिती मिळाल्याने आहेर यांनी स्थानिक गुन्हे शाखेतील पोलीस उपनिरीक्षक तुषार धाकराव व पोलीस अंमलदार अतुल लोटके, अमृत आढाव तसेच मनोज गोसावी व रमीजराजा आत्तार यांचे तपास पथक नेमुन मिळालेल्या बातमीनुसार खात्री करुन कारवाई करण्याबाबत आवश्यक सुचना दिल्या.

तपास पथकाने संगमनेर शहरात सहदेव ज्वेलर्सचे वरच्या मजल्यावरील खोलीमध्ये, पार्श्वथान गल्ली, संगमनेर येथे जाऊन खात्री केली असता दोन इसम मिळून आले. मुकेशकुमार रमेशभाई पटेल (वय 36, रा.पार्श्वनाथ गल्ली, जैन मंदिराजवळ, संगमनेर मुळ राहणार गोठवा, ता.विसनगर, जिल्हा म्हैसाणा, गुजरात), धवलकुमार जसवंतभाई पटेल (वय 32, रा. रा.पार्श्वनाथ गल्ली, जैन मंदिराजवळ, संगमनेर मुळ रा.ठलोटा, ता.विसनगर, जि.म्हैसाणा, गुजरात) हे आढळून आले.

पंचासमक्ष त्यांच्या कब्जात असलेल्या रोख रक्कमेबाबत सखोल चौकशी केली असता त्यांनी सदरची रक्कम हवाल्याची असल्याचे सांगून ती त्यांचे मालक भावेश रामाभाई पटेल (रा.पार्श्वनाथ गल्ली, संगमनेर) आशीष सुभाष वर्मा (रा.अहिल्यानगर) यांची असल्याचे सांगीतले.

तपास पथकाने अधिक चौकशी केली असता मुकेशकुमार रमेशभाई पटेल व धवलकुमार जसवंतभाई पटेल यांचेकडे असलेली रक्कम ही त्यांनी कोठूनतरी बेकायदेशीर मार्गाने जमवून शासनाचा कर चुकवून स्वत:च्या फायदयाकरीता हवाल्यामार्फत विल्हेवाट लावण्याकरीता मिळून आल्याची खात्री झाल्याने मुकेशकुमार रमेशभाई पटेल यांचे कब्जामधुन 40,26,000/- रूपये रोख रक्कम व धवलकुमार जसवंतभाई पटेल याचे कब्जामधुन 1,89,000/- रूपये रोख रक्कम अशी एकुण 42,15,000/- रूपये रोख रक्कम जप्त करून ताब्यात घेण्यात आली आहे. ताब्यात घेण्यात आलेल्या 42,15,000/- रूपये रोख रक्कमेबाबत पुढील कायदेशीर कारवाईची प्रक्रिया चालू आहे.