संगमनेर नगरपालिकेच्या दोन अभियंत्यांवर फसवणुकीचा गुन्हा दाखल !
अमरधाम सुशोभीकरण व नूतनीकरण प्रकरण
प्रतिनिधी —
संगमनेर शहरातील अमरधामच्या सुशोभीकरण व नूतनीकरण कामाच्या टप्प्यातील क्रमांक दोन व तीन मधील कामे निविदा काढण्यापूर्वीच केलेली असताना तसा त्याचा स्थळ पाहणी अहवाल (स्पॉट इन्स्पेक्शन रिपोर्ट) नगरपालिकेला सादर करणे आवश्यक असताना तसे न करता त्याची निविदा काढून फसवणूक करण्याचा प्रयत्न केल्याबद्दल संगमनेर नगरपालिकेच्या दोन अधिकाऱ्यांवर संगमनेर शहर पोलीस ठाण्यात फसवणुकीचा गुन्हा दाखल करण्यात आला आहे.
राजेंद्र सुतावणे, नगर अभियंता आणि सूर्यकांत गवळी, कनिष्ठ अभियंता संगमनेर नगरपरिषद असे गुन्हा दाखल करण्यात आलेल्या आरोपींची नावे आहेत. यासंदर्भात श्रीरामपूर नगर परिषदेचे मुख्याधिकारी गणेश कारभारी शिंदे यांनी संगमनेर शहर पोलीस ठाण्यात फिर्याद दिली आहे.
अमरधाम येथील सुशोभीकरण करण्याच्या कामाच्या निविदां बाबत संगमनेर भाजपाच्या वतीने करण्यात आली होती. या कामात गैरवव्यवहार झाला असा त्यांचा आरोप होता.
त्यानंतर जिल्हाधिकारी यांनी या तक्रारीच्या अनुषंगाने द्विसदस्य चौकशी समिती नेमली होती. या चौकशी समितीत सार्वजनिक बांधकाम विभागाचे संगमनेरचे सहाय्यक अभियंता सौरभ पाटील आणि श्रीरामपूर नगरपालिके मुख्याधिकारी गणेश शिंदे यांची नियुक्ती केली होती.
अमरधाम सुशोभीकरण व नूतनीकरण कामाच्या बाबत केलेल्या तक्रारीच्या अनुषंगाने समितीने चौकशी केली असता यामध्ये आर्थिक गैरव्यवहार व अपहार झालेला आढळून येत नाही किंवा तसा प्रयत्न केल्याच्या दिसून येत नाही. मात्र टप्पा क्रमांक दोन व तीन या कामाच्या निविदा प्रक्रिया करताना बांधकाम अभियंता यांचे दुर्लक्ष झालेले दिसून येते. तसेच त्याचा स्थळ पाहणी अहवाल देखील सादर केला नसला गेल्याने प्रशासकीय बाबींच्या नियमाने या दोघांनी नगरपालिकेला फसवण्याचा प्रयत्न केला असल्याचे समितीने नमूद केले. त्यावरून या दोघांवर गुन्हा दाखल करण्यात आला आहे.
संगमनेर नगरपालिकेच्या अमरधाम सुशोभीकरण आणि नूतनीकरण प्रकरणाचे पडसाद चांगलेच उमटले होते. संगमनेर शहर भाजपच्या वतीने याबाबत वेळोवेळी आंदोलने करण्यात आली होती. सत्ताधारी नगरसेवक, नगराध्यक्ष यांच्यावर देखील गुन्हे दाखल होतील अशी चर्चा होती. परंतु चौकशी समितीत या सर्वांना क्लीन चिट मिळाल्याने त्यांच्यावर कोणताही गुन्हा दाखल करण्यात आलेला नाही.
