कोंची घाटात रस्तालुट ;

ओमीनी गाडी चालकाला लुटले

प्रतिनिधी —

संगमनेर ते लोणी रस्त्यावर संगमनेर तालुक्यातील कोंची घाटात शुक्रवारी रात्री ९ वाजेच्या सुमारास अज्ञात चोरट्यांनी ओमीनी व्हॅनच्या काचेवर अंडे फेकत व चाकूहल्ला करीत ओमीनी चालकाकडील ६० हजार रुपये रक्कम लुटल्याची घटना घडली.
या प्रकरणी रस्तालुट करणाऱ्या तिघा अज्ञात चोरट्यांविरुद्ध संगमनेर तालुका पोलीस ठाण्यात गुन्हा दाखल करण्यात आला आहे.

पोलिसांनी दिलेली माहिती अशी : मार्केटिंगचे काम करणारे अनिकेत मच्छिंद्र कडलग ( वय २९ वर्ष रा. जवळेकडलग ता. संगमनेर ) हे ओमिनी व्हॅनमधून ( क्रमांक एमएच १२ केजे ७९७५ ) प्रवास करीत होते. ते शुक्रवारी रात्री ९ वाजेच्या सुमारास कोंची घाटात आले असता गाडीच्या पाठीमागून दुचाकीवरून आलेल्या तिघा चोरट्यांनी गाडीच्या काचेवर दोन अंडे फेकले.

त्यामुळे अनिकेत कडलग यांनी गाडी थांबविली. त्यानंतर तत्काळ तिघा चोरट्यांपैकी दोघांनी दुचाकीवरून खाली उतरून एका चोरट्याने अनिकेत कडलग यांच्या डोक्यात टनक वस्तू मारली व चाकूने हातावर वार केला. अनिकेत कडलग यांना मारहाण करीत गाडीच्या सीटवर ठेवलेली ६० हजार रुपयांची रक्कम चोरट्यांनी बळजबरीने काढून घेत पसार झाले.
त्यानंतर अनिकेत मच्छिंद्र कडलग यांनी संगमनेर तालुका पोलीस ठाणे गाठले फिर्याद दिली. या रस्तालुट प्रकरणी तिघा अज्ञात चोरट्यांविरुद्ध संगमनेर तालुका पोलीस ठाण्यात जबरी चोरीचा गुन्हा नोंदविण्यात आला आहे.

पोलीस निरीक्षक पांडुरंग पवार यांच्या मार्गदर्शनाखाली पोलिस उपनिरीक्षक विजय खंडीझोड अधिक तपास करीत आहेत.