संगमनेर तालुक्यातील कोंची गावच्या वनक्षेत्रातून राजरोसपणे गौण खनिज चोरी !
राजकीय वरदहस्तांमुळे रहिमपूरच्या आकाची दादागिरी
संगमनेर प्रतिनिधी दि. 8
संगमनेर तालुक्यातील वनक्षेत्रात असणाऱ्या कोंची गावाच्या शिवारातील डोंगरातून मोठ्या प्रमाणावर राजरोसपणे मुरुमाची तस्करी सुरू आहे. या भागातून हजारो ब्रास मुरूम तस्करांनी चोरून नेलाय. शनिवारी दुपारी पोकलेनने उपसा करून डंपरच्या साह्याने बिनधास्तपणे मुरूम वाहतूक सुरु होती. या घटनेची माहिती मिळाल्यावर त्या ठिकाणी संगमनेरच्या महसूल अधिकारी कर्मचाऱ्यांनी धाव घेत डंपर व पोकलेन ताब्यात घेतला असल्याची माहिती मिळाली असून आता दादागिरी करणाऱ्या गौण खनिज तस्करांवर कोणता गुन्हा दाखल होतो याकडे सर्वांचे लक्ष लागून आहे.
अनेक दिवसांपासून राजकीय वरदहस्थातून महसूल प्रशासनावर दादागिरी करत असलेला ‘रहिमपूरच्या आका’ चा हा उद्योग असल्याचा समजताच याबाबत गावकऱ्यांनी प्रशासनाला पुराव्यांसह माहिती दिल्यानंतर महसूलच्या वरिष्ठ अधिकाऱ्यांनी मंडळाधिकारी आणि तलाठ्यांना तात्काळ कारवाईचे आदेश दिले.
वनक्षेत्रात मोठ्या प्रमाणात मुरूम उत्खनन केले आहे. या ठिकाणी पोकलेनच्या माध्यमातून डंपरद्वारे मुरूम वाहतूक सुरू होती. महसूल प्रशासनाचे अधिकारी घटनास्थळी आल्याचे पाहताच चालकाने पोकलेन जागेवरच सोडून धूम ठोकली. त्यानंतर हा डंपर जप्त केला आहे. विशेष म्हणजे संगमनेर तालुक्यातील रहिमपूर येथील आकाचा हा पोकलेन असून या आकावर आणि त्याच्या पंटर वर राजकीय वरदहस्त असल्याने हे मुरूम तस्कर प्रशासनाला ही जुमानत नाहीत . अनेक वेळा त्याने महसूल मधील कर्मचारी भरारी पथक व इतरांना शिवीगाळ केली आहे.
दिवसाढवळ्या संगमनेर तालुक्यातील डोंगर पोखरून या तस्करांनी मोठी माया जमवली आहे. गेल्या अनेक दिवसापासून या ठिकाणी हजारो डंपर मुरमाची तस्करी केल्याचे दिसून येते. मोठमोठे डोंगराचे पोट ओरबाडून या तस्करांनी आपल्या तुंबड्या भरल्या आहेत.
घटनेची माहिती समजतात तालुका पोलीसही घटनास्थळी दाखल झाले असल्याची माहिती मिळाली आहे. पोकलेन चालक पळून गेल्याने हा पोकलेन घेऊन कसा यायचा असा प्रश्न महसूल आणि पोलीस प्रशासनापुढे उभा होता. या कारवाईत महसूल प्रशासनावर मोठा दबाव असल्याचाही बोलले जात असले तरी हा दबाव झुकारून कायदेशीर कारवाई केली असल्याचे सांगितले जाते.
या मुरूम तस्करांनी गेल्या दोन महिन्यापासून कोकणगाव कोंची मांची येथील डोंगर अक्षरशः पोखरून काढले आहेत. मुरम तस्करांवर मोका अंतर्गत कारवाई करणं गरजेचे आहे. यापूर्वीही काही जणांवर कारवाई झाली होती मात्र त्यांनी तहसील व पोलीस स्टेशन आवारातून आपली जप्त केलेली वाहने पळून नेली असल्याचेही चर्चा होती.