केंद्रीय लोकसेवा आयोग परीक्षेच्या तयारीसाठी हज हाऊस मधील मोफत निवासी प्रशिक्षण पूर्ण क्षमतेने सुरु करण्याची मागणी.
 
प्रतिनिधी —

देशभरातील मुस्लिमांची सामाजिक आणि आर्थिक परिस्थिती लक्षात घेता शासकीय सेवेत मुस्लिमांचा टक्का खूपच कमी असल्याचे चित्र विविध रिपोर्टद्वारा समोर आले आहे. मात्र शैक्षणिक मागासलेपणा आणि आर्थिक दृष्ट्या कमकुवत असल्या कारणाने मोठ्या अडचणी निर्माण होतात.
अशा परिस्थितीत हज कमिटी ऑफ इंडिया कडून हाऊस मुंबई येथे यूपीएससीसाठी सुरू असलेले मोफत निवासी प्रशिक्षण केंद्र पूर्ण क्षमतेने सुरु करण्यात यावे.

अशी मागणी एकता सामाजिक सेवाभावी संघटनेकडून सरकार दरबारी करण्यात आली आहे. तशा आशयाचे निवेदन संगमनेर चे प्रांत अधिकारी डॉ. शशिकांत मंगरुळे यांना देण्यात आले आहे.

सध्या हज हाऊस येथील यूपीएससी कोचिंग मधील काही सिनियर विद्यार्थी बाहेर काढल्याची घटना घडली. येत्या जूनच्या पहिल्या आठवड्यात यूपीएससीची पूर्व परीक्षा आहे. सिनियर विद्यार्थ्यांना जर आत्ताच बाहेर काढले तर येणाऱ्या परीक्षेचा अभ्यास करण्यासाठी त्यांना मोठी अडचण निर्माण होईल.

हज हाऊस मुंबईतील मोफत निवासी यूपीएससी प्रशिक्षण सुविधा पूर्ण क्षमतेने सुरू करणे गरजेचे आहे. कारण त्यातून जास्तीत जास्त विद्यार्थ्यांना संधी मिळतील आणि त्याचा फायदा त्यांना अभ्यासात होईल. परिणामी यूपीएससीमध्ये मुस्लिम उमेदवारांची संख्या वाढण्यास मदत होईल
महाराष्ट्रातील मुस्लिम विद्यार्थ्यांसाठी हज हाऊस येथील प्रशिक्षण केंद्र हे महाराष्ट्र अभ्यास करण्यासाठी सुविधा पुरविणारी एकमेव संस्था आहे. म्हणून ती संस्था पूर्ण क्षमतेने सुरू करणे गरजेचे आहे.

विशेष करून मुस्लिम मुलींना हज हाऊसच्या निवासी प्रशिक्षणामध्ये जास्तीत जास्त टक्का वाढविण्यासाठी विशेष प्रयत्न करणे गरजेचे आहे. प्रत्येक वर्षीच्या प्रवेशामध्ये मुस्लिम मुलींसाठी काही जागा आरक्षित करणे देखील काळाची गरज आहे.

महाराष्ट्रातील नागपूर आणि औरंगाबाद या दोन्ही ठिकाणी हज हाऊसच्या अस्तित्वात असलेल्या इमारतीमध्ये यूपीएससीची आणि एमपीएससीसाठी मोफत निवासी प्रशिक्षण व ग्रंथालय आणि अभ्यासिका सुरू करणे गरजेचे आहे. कारण यामुळे विदर्भ, मराठवाडा, खानदेश या भागातील विद्यार्थ्यांना याचा फायदा होईल. गरीब आणि होतकरू विद्यार्थी यूपीएससी, एमपीएससीसाठी प्रयत्न करू लागतील.

हज हाऊस मोफत निवासी यूपीएससी प्रशिक्षण केंद्र पूर्ण क्षमतेने म्हणजेच संपूर्ण २०० जागा भरण्यात याव्यात.
मुस्लिम मुलींसाठी हाऊस येथील यूपीएससीच्या निवासी प्रशिक्षण केंद्रात ५० जागा या मुलींसाठी आरक्षित ठेवण्यात याव्यात.

महाराष्ट्रातील नागपूर आणि औरंगाबाद येथे मुंबई हज हाऊसच्या धर्तीवर मोफत युपीएससी, एमपीएससी
प्रशिक्षण केंद्र सर्व सुखसोयींनी युक्त उभारण्यात यावे.
ज्या विद्यार्थ्यांनी सन २०२१ ची मुख्य परीक्षा दिली आहे त्यांना चालू शैक्षणिक वर्षात हज हाऊसमध्येच ठेवण्यात यावे. ज्या सिनियर विद्यार्थ्यांना बाहेर काढले गेले आहे त्यातील होतकरू विद्यार्थ्यांना हज हाऊस मध्येच ठेवण्यात यावे. प्रशिक्षण घेणाऱ्या प्रत्येक विद्यार्थ्यांना पूर्वाश्रमीची मेस सबसिडी मासिक १५०० रुपये प्रमाणे देण्यात यावी.
असे निवेदनात म्हटले आहे.

एकता सामाजिक सेवाभावी संस्थेचे हुसेन शेख, इरफान शेख, सादिक तांबोळी, आसिफ शेख, मुजम्मिल शेख (गुड्डू), राजूभाई इनामदार, शौकत पठाण, ख्रिस्ती विकास परिषदेचे अध्यक्ष अनिल भोसले यांच्या वतीने हे निवेदन देण्यात आले आहे.