संगमनेर उत्स्फूर्तपणे बंद !
छोट्या मोठ्या व्यापाऱ्यांसह सर्व संगमनेरकरांचा मोठा प्रतिसाद..
(सर्व छायाचित्रे काशिनाथ गोसावी, संगमनेर)
प्रतिनिधी —
सकल हिंदू समाजाच्या वतीने आज संगमनेर मध्ये भगवा मोर्चाचे आयोजन केले होते. या मोर्चाला प्रचंड प्रतिसाद तर मिळालाच परंतु संगमनेरकर नागरिकांनी, व्यापाऱ्यांनी आपापले व्यवहार बंद ठेवून उत्स्फूर्तपणे या मोर्चाला समर्थन दिले. संगमनेर शहर आणि परिसरात उत्स्फूर्तपणे बंद पाळण्यात आला.
सकल हिंदू समाजाच्या वतीने संगमनेर मध्ये आयोजित केलेल्या ‘भगवा मोर्चा’ ला संगमनेर शहरासह ग्रामीण भागातून प्रचंड प्रतिसाद मिळाला. हजारोंच्या संख्येने तरुण आणि नागरिक या मोर्चात सहभागी झाले होते. महिला आणि तरुणांची संख्या देखील लक्षणीय होती. भव्य असे मोर्चाने संगमनेर शहराचे वातावरण ‘भगवे’ करून टाकण्यात आले होते. सकाळी लाल बहादूर शास्त्री चौकातून सुरू झालेला मोर्चाची सांगता नवीन नगर रोडवरील प्रशासकीय इमारत प्रांत अधिकारी कार्यालय समोर सभेच्या रूपाने झाली.
महाराष्ट्रात हिंदूंच्या सणांवर होणारे हल्ले, दिल्लीत साक्षीची जिहादींकडून चाकूने अनेक वार करून केलेली हत्या, अवैध गोवंश कत्तलखाने व जोर्वे (संगमनेर) गावातील ८ हिंदू तरुणांवर तलवारीने झालेल्या जीवघेण्या हल्ल्याच्या निषेधार्थ या मोर्चाचे आयोजन करण्यात आले होते.
प्रशासन आणि मोर्चाचे आयोजक यांच्यात मोर्चा होईपर्यंत सातत्याने समन्वय आणि नियोजनाच्या बैठका संदर्भात झालेल्या विविध चर्चांमुळे मोर्चा कुठलेही गालबोट न लागता शांततेत पार पडला. संगमनेरच्या पोलीस प्रशासनाने यावेळी चोख भूमिका बजावली आहे.
संगमनेर नगरपालिका, लालबहादूर शास्त्री चौक ते बाजारपेठ, तेलीखुंट, सय्यद बाबा चौक, मेन रोड, चावडी, अशोक चौक, मोमीनपुरा चौक, छत्रपती शिवाजी महाराज पुतळा, बस स्थानक ते नवीन नगर रोडवरील प्रशासकीय इमारतीतील प्रांत कार्यालय अशा मार्गाने हा मोर्चा प्रांत कार्यालयावर येऊन धडकला. त्यानंतर मोर्चाचे सभेत रूपांतर झाले. संगमनेर बंदला देखील नागरिकांनी उत्स्फूर्त प्रतिसाद दिला.
