दोन देशमुख एकमेकांना भिडले…एकाने डोके फोडले तर दुसऱ्याने जमीन दाखवली !

प्रतिनिधी —

शहरात पैशाच्या देवाण घेवाणीच्या वादातून दोन देशमुखांमध्येच तुंबळ हाणामारी झाल्याची घटना घडली आहे. यातील एका देशमुखाने दुसऱ्या देशमुखाच्या डोक्यात पाण्याचा स्टीलचा जग मारल्याने दुसरे देशमुख रक्तबंबाळ झाले. अन त्यांच्या डोक्याला दोन टाके पडले. ही सर्व घटना सीसीटीव्हीमध्ये कैद झाली आहे.

अकोले शहरातील अगस्ती विद्यालयासमोर असलेल्या हॉटेल दिपज्योती जवळ ही घटना घडली. हॉटेल दिपज्योतीमध्ये प्रशांत संपतराव देशमुख हे चहा पिण्यासाठी आले होते. त्याचवेळी नरेंद्र मधुकर देशमुख हे ही त्याठिकाणी आले. यावेळी सुरुवातीला दोघांमध्ये शांततेत चर्चा सुरू होती. मात्र नंतर त्यांच्यात शाब्दिक बाचाबाची वाढत जाऊन त्याचे रूपांतर थेट हाणामारीत झाले.

प्रशांत देशमुख यांनी नरेंद्र देशमुख यांच्या डोक्यात पाण्याचा जग मारल्याने ते जखमी झाले. अशा ही परिस्थितीत त्यांनी प्रशांत देशमुख यांना जमिनीवर यथेच्छ लोळवले. मात्र डोक्यातून अति रक्तस्राव होत असल्याने त्यांनी अकोले ग्रामीण रुग्णालयात जाऊन उपचार घेतला.

दरम्यान ही सर्व घटना सीसीटीव्ही कॅमेऱ्यात कैद झाली आहे. डोक्यात स्टीलच्या जगाचा जोरदार प्रहार झाल्यामुळे नरेंद्र देशमुख यांच्या डोक्याला दोन टाके पडले आहेत. त्यातच त्यांचा रक्तदाब वाढल्याने त्यांना पुढील उपचारासाठी खासगी हॉस्पिटलमध्ये दाखल करण्यात आले.

रात्री उशिरा नरेंद्र देशमुख यांच्या फिर्यादीवरून प्रशांत संपतराव देशमुख (रा. सुगाव बुद्रुक, ता.अकोले) याच्यावर भारतीय गुन्हा दाखल करण्यात आला आहे. तर प्रशांत देशमुख यांनीही अकोले पोलीस ठाण्यात फिर्याद दाखल केली असून त्यांच्या फिर्यादीवरून नरेंद्र मधुकर देशमुख (रा. रुंभोडी, ता. अकोले ) यांच्यावर सुद्धा गुन्हा दाखल करण्यात आला आहे.

अकोले पोलिसांनी घटनास्थळी येऊन गुन्ह्यात वापरलेला स्टीलचा जग पंचनामा करून ताब्यात घेतला आहे. या घटनेचा तपास अकोले पोलीस ठाण्याचे पोलीस निरीक्षक मिथुन घुगे यांच्या मार्गदर्शनाखाली हवालदार महेश आहेर हे करीत आहेत.

दरम्यान या मारहाणीचा व्हिडिओ सोशल मिडियात प्रचंड व्हायरल झाला आहे.