शिकारीचे कारण… वाद झाला…   दोघांनी त्याचा खून केला !

अकस्मात मृत्यू प्रकरणाचा उलगडा – दोन आरोपी ताब्यात

 संगमनेर टाइम्स न्यूज नेटवर्क दिनांक 9 

शिकारीला गेलेल्या मित्रांमध्ये वाद होऊन या वादाचे रूपांतर भांडणात झाले आणि दोन मित्रांनी त्यांच्या जवळच्या मित्राच्या डोक्यात लोखंडी गजाने घाव घालीत खून करण्याची घटना शेवगाव तालुक्यात घडली होती. सुरुवातीला अकस्मात पृथ्वीची नोंद करण्यात आली. परंतु पोलिसांच्या तपासात हा खून असल्याचे उघड झाले असून पोलिसांनी याप्रकरणी दोघांना ताब्यात घेतले आहे.

शेवगाव पोलिस ठाणे हद्दीतील (ठाकूर पिंपळगाव, ता. शेवगाव, जि. अहिल्यानगर) येथील ऊसाच्या शेतात अंदाजे २०-२२ वर्षे वयाच्या अज्ञात तरुणाचा मृतदेह सापडला होता. मृत्यू संशयास्पद असल्याने सदर प्रकरणी शेवगाव पोस्टे अकस्मात मृत्यू रजि. क्र. ९४/२०२५, भा. न्या. सु. सं. कलम 194 प्रमाणे दाखल करण्यात आला.

तपासादरम्यान मयताची ओळख पटवून त्याचे नाव आकाश लक्ष्मण किडमिचे (वय २० वर्षे, रा. रामनगर, शेवगाव) असे निश्चित करण्यात आले. स्थानिक गुन्हे शाखा, अहिल्यानगरचे पोलीस निरीक्षक किरणकुमार कबाडी यांच्या आदेशान्वये पोहेकॉ २१५९ हृदय घोडके, पोहेकॉ किशोर शिरसाठ, पोहेकॉ सागर ससाणे, पोहेकॉ प्रमोद जाधव व चासफो उमाकांत गावडे यांनी समांतर तपास करून, खालील आरोपींना ताब्यात घेतले –

१) विजय चंदर किडमिचे (वय २० वर्षे) २) अरुण लाला उपदे (वय १९ वर्षे) (दोघे रा. रामनगर, शेवगाव, जि. अहिल्यानगर) या दोघांना ताब्यात घेण्यात आले आहे.

शिकारीला गेल्याच्या कारणावरून झालेल्या वादातून लोखंडी गजाने डोक्यावर मारून मयताचा खून केल्याची आरोपींनी कबुली दिली आहे. दोन्ही आरोपींना दिनांक ०९/०८/२०२५ रोजी शेवगाव पोलिसांच्या ताब्यात देण्यात आले असून, पुढील कायदेशीर कारवाई सुरू आहे.