संगमनेर शहर आणि तालुक्यात चोरट्यांचा धुमाकूळ ! 

शहर, निमोण, घारगावात घरफोड्या !!

संगमनेर प्रतिनिधी दिनांक 2 

संगमनेर शहर आणि तालुक्यात अवैध धंद्यां बरोबरच कत्तलखान्यांनी हैदोस घातल्यानंतर आता चोरट्यांचा धुमाकूळ सुरू झाला असून शहरासह ग्रामीण भागातील निमोण आणि पठारातील घारगाव या ठिकाणी घरफोड्या करून लाखो रुपयांचे सोन्या चांदीचे दागिने व रोख रक्कम लंपास करण्यात आली आहे.

विशेष म्हणजे घरफोडीच्या घटना एकाच दिवशी घडल्या असल्याचे चित्र आहे. संगमनेरला उपविभाग असून पोलीस उपअधीक्षक दर्जाचे अधिकारी देखील आहेत. चार चार पोलीस ठाणे असून देखील चोरट्यांवर कुठलाही वचक राहिला नसल्याचे दिसून येत आहे.

संगमनेर तालुक्यातील पठार भागात असणाऱ्या घारगाव पोलीस ठाण्याच्या हद्दीत घरफोडी करण्यात आली. 4 लाख 86 हजार रुपयांचे सोन्याचांदीचे दागिने आणि रोख रक्कम चोरट्यांनी लांबवली आहे.

संगमनेर तालुक्यातील निमोण गावात घरफोडून चोरट्यांनी सोन्या चांदीचे दागिने आणि रोख रक्कम लंपास केली आहे. यामध्ये 54 हजार पाचशे रुपयांच्या मुद्देमालाची चोरी झाली आहे.

संगमनेर शहरात झालेल्या घरफोडीत 1 लाख 66 हजार रुपये किमतीचे सोन्या-चांदीचे दागिने आणि चलनी नोटा चोरट्यांनी लंपास केल्या आहेत. तर संगमनेर तालुक्यातील पिंपळे या गावातील घर सोडून 30 हजार रुपयांचे सोन्या चांदीचे दागिने चोरट्यांनी पळवून नेले आहेत.

विशेष म्हणजे संगमनेर तालुक्यात सर्वत्र मोटार सायकल चोरीचे प्रमाण देखील वाढलेले आहे. शहरातील बस स्थानकावर होणाऱ्या चोऱ्यांचे प्रमाण देखील सातत्याने सुरूच आहे गंठण चोरी पर्स पाकीट इत्यादी चोऱ्या देखील होत आहेत. एकाच दिवशी चार ठिकाणी घरफोड्या त्याही शहर ग्रामीण आणि घारगाव पोलीस स्टेशनच्या हद्दीत करण्यात आल्या आहेत. संपूर्ण तालुका चोरट्यांनी त्यांचे कार्यक्षेत्र केल्याचे बोलले जात आहे. त्यामुळे पोलीस नेमके काय करतात असा सवाल उपस्थित झाला आहे.