संगमनेर शहरासाठी तातडीने जलशुद्धीकरण प्रकल्प सुरू करावा ;
महाराष्ट्र नवनिर्माण सेनेची मागणी
प्रतिनिधी —
संगमनेर शहरासाठी तातडीने जलशुद्धीकरण प्रकल्प सुरू करावा अशी मागणी संगमनेर शहर महाराष्ट्र नवनिर्माण सेनेच्या वतीने करण्यात आलेली आहे.
याबाबत नगरपरिषदेचे मुख्याधिकारी राहुल वाघ यांना निवेदन देण्यात आले.
निवेदनात म्हटले आहे की, संगमनेर शहराची लोकसंख्या दिवसेंदिवस वाढत आहे. तेवढ्या पायाभूत सुविधा नगरपरिषदेने उपलब्ध केलेल्या नाहीत. शहरातील नागरिकांचे आरोग्य चांगले राखण्यासाठी सर्व सुविधांनी परिपूर्ण अशा रुग्णालयाची गरज आहेच परंतु त्याच बरोबर शहराला दुर्गंधीयुक्त आणि प्रदूषणमुक्त पाणीपुरवठा होत आहे. त्यामुळे हा पाणीपुरवठा बंद करावा आणि नागरिकांना स्वच्छ आणि शुद्ध पाणीपुरवठा करण्यात यावा अशी मागणी निवेदनात केली आहे.
तसेच शहरातील रुग्णालये, हॉटेल, औद्योगिक व्यवसायाचे रसायनयुक्त पाणी प्रवरा नदीपात्रात मागील अनेक वर्षापासून सोडण्यात येत आहेत. शहरात चालू असलेल्या अवैध कत्तलखान्याचे दूषित व दुर्गंधीयुक्त पाणी देखील नदीपात्रात सोडले जाते, या घटना ही वेळोवेळी उघडकीस आल्या आहेत.
मात्र पालिका प्रशासनाकडून याकडे दुर्लक्ष झाल्यामुळे शहरातील नागरिकांना दुर्गंधीयुक्त प्रदूषित पाणी पुरवठा होत आहे. सध्याच्या निर्माण झालेल्या परिस्थितीत नागरिकांचे आरोग्य सुरक्षित राखण्यासाठी पालिकेने या सर्व प्रकारांवर कारवाई करणे व कठोर पाऊल उचलणे उचित आहे.
शहरामध्ये एसटीपी प्लांट उभा करणे गरजेचे असून पालिकेने याकडे दुर्लक्ष करून हा प्रश्न अनेक वर्षांपासून प्रलंबित ठेवलेला आहे.
दूषित पाण्याचे विपरीत परिणाम नागरिकांच्या आरोग्यावर होत आहेत. त्यामुळे रुग्णांची संख्या देखील वाढत आहे.
या सर्व पार्श्वभूमीचा विचार करून पालिका प्रशासनाने तातडीने एसीटीपी प्लांट लवकरात लवकर उभारावा.
तसेच प्रवरा नदीपात्रात सोडण्यात येत असलेले दूषित पाणी यावर निर्बंध लावावेत.
अशी मागणी महाराष्ट्र नवनिर्माण सेनेच्या वतीने करण्यात आली असून नगरपालिकेने कारवाई न केल्यास मनसे स्टाईलने तीव्र आंदोलन केले जाईल असा इशारा देखील निवेदन देण्यात आलेला आहे.
या निवेदनावर संगमनेर शहर अध्यक्ष तुषार ठाकूर तसेच अभिजीत घाडगे, अविनाश भोर, अशोक शिंदे, आकाश भोसले, अक्षय जगताप, राम शिंदे यांची नावे व स्वाक्षर्या आहेत.