चार वर्षांपासून दुरावलेले पती-पत्नी राष्ट्रीय लोक अदालतीच्या माध्यमातून पुन्हा एकत्र
संगमनेर टाइम्स न्यूज नेटवर्क —
अर्जदार व सामनेवाला यांचा विवाह दि. १३ नोव्हेंबर २०१८ रोजी झाला होता. सन २०२० व २०२१ मध्ये त्यांना दोन कन्यारत्ने प्राप्त झाली. संसार सुरू असताना छोट्या-मोठ्या कुरबुरी होत राहिल्या. त्यातून गैरसमज वाढत गेले आणि सन २०२१ पासून दोघेही वेगवेगळे राहत होते. परस्परांतील मतभेद अधिक तीव्र झाल्याने संबंधित दोन प्रकरणे न्यायालयात दाखल करण्यात आली होती.
ही दोन्ही प्रकरणे दि. १३ डिसेंबर २०२५ रोजी आयोजित राष्ट्रीय लोक अदालतीत तडजोडीसाठी ठेवण्यात आली होती. यावेळी पॅनल प्रमुख एल. एस. पाढेन व जे. डी. उपरकर, तसेच अर्जदारांच्या विधीज्ञ वकील आशा गोंधळे आणि सामनेवाल्यांच्या विधीज्ञ वकील सुजाता पंडित यांनी दोन्ही पक्षकारांचे योग्य समुपदेशन केले.
समुपदेशनानंतर दोन्ही पक्षकारांनी आपल्या दोन मुलींच्या उज्ज्वल भवितव्याचा विचार करून परस्पर समझोता करण्यास सहमती दर्शविली. परिणामी, चार वर्षांपासून दुरावलेले पती-पत्नी राष्ट्रीय लोक अदालतीच्या माध्यमातून पुन्हा एकत्र आले असून, आज ते आपल्या मुलींसह एकत्र राहण्यास गेले आहेत.
राष्ट्रीय लोक अदालतीच्या माध्यमातून कौटुंबिक वाद सौहार्दपूर्णरीत्या निकाली काढण्याचा हा उपक्रम समाजात सलोखा व कौटुंबिक एकोपा वाढविण्यास निश्चितच प्रेरणादायी ठरला आहे.